الأحد، 31 أكتوبر، 2010

العالم من فوق دراجه(6)درس خصوصى_+ تحديث بيت المدونين

=تحديث بيت المدونين تعالى شارك

ويكا بقولولكم  
 =================================== 
مقتل شاب مصرى على يد النازين الجدد فى المانيا
الشهاب 
______________________ 
السلام عليكم

ذكريات  باحث عن حب
_____________________________
العالم من  فوق دراجه
____________________________
درس خصوصى 2
========================
شكرا  لكل من  تفاعل معايا 
وان الذكريات عجبتكم
نكمل 
كلامنا  عن الاعدادى والثانوى
________________________


الاعدادى

الاستاذ مؤمن البنانى

ده اخويا  الكبير مدرس لغه انجليزيه 

تلوقتى  الحمد لله مدرس اول ثانوى 

وطبعا انا مقدرش اطلع من تحت ايديه 3سنين اعادى و4سنين ثانوى

باعتبار يعنى 


انى اخدت الثانويه  فى 2

طبعا  من اولى اعدادى لغايه  3ثانوى  وانا معاه ومعايا شله الفشله  

طبعا اصحابى واصدقائى فى ذاك الوقت الغريب ان اصحابى هما هما ما اتغيروش 

من الابتدائى معهد دينى ابتدائى اعدادى ثانوى 

اختلفنا فى الكليات 

وطبعا مجموعتى كانت  

فيها الصفوه الفشله  فى الدفعه  بتاعتى

ومؤمن  شاف مننا الوان العذاب 

طبعا الانجليزى عرفته على ايده طبعا 

ودائما الحمد  لله  بغشش العيال فى المعهد

كنت الاول دائما 
وموعد مجموعتى كان بيكون بالليل خالص 

كانوا يجوا البيت عندنا نضحك ونلعب 

ويمشوا بالليل خالص 

طبعا مؤمن كان بيدى وما زال الحصص بتاعته  فى البيت بتاعنا 

فى  نفس مكان مذاكرته من الاعدادى حجرته  هى  هى حتى الان بيدى فيها الدروس

طبعا تزوج وربنا اكرمه  بالاولاد طبعا بس طبعا ساكن فى مكان تانى ومش عاوز

يسيب  البيت بتاعنا 

وهو محبوب من الطلاب كلهم   والحمد  لله  حتى فى مدرسته  

يارب يبارك فيه  يارب ويجزيه عنا خير الجزاء

ملحوظه

محدش يبلغ  الوزاره علشان الدروس الخصوصيه
 دا برضوا  اخويا
هههههههههههههههههههههههه
_________________________________

الاستاذ محمد البدرى 

موضوع   ان  مدرس كشكول طبعا غير وارده  فى المرحله دى طبعا 

وطبعا الوقت مزنوق خالص مالص

ما بين المواد الازهريه الشرعيه والعربيه والثقافيه

بس كان فى الاستاذ محمد البدرى ده دفعه اخويا مؤمن 

هو اللى احببنى فى العلوم هو مدرس علوم تخصص كيمياء


بس اخدت عنده علوم  من  اولى اعدادى لغايه 

تالته اعادى وكيمياء وفيزياء اولى وتانيه  ثانوى 

بس فى تالته  ثانوى  طبعا  شهادات  سيبته  وهو كان زعلان منى طبعا 

علشان  ميكونش فى لغبطه  

الثانويه الازهريه سنه واحده مش اتنين  زى الثانويه العامه
والفقير كنت علمى 

بدرس كيمياء واحياء وفيزياء ورياضه

طبعا  

الاستاذ محمد البدرى زى مؤمن  بالضبط  انتيمه طبعا 

حببنى فى العلوم  خالص خالص  والموضوع مش شويه علم وبس لآ الموضوع  

اخلاق  

طبعا  لانه محترم خالص وادين له  بالفضل 

هو كان احد الاسباب اللى خلانى احدد انى هدخل

علمى 

بحبى للماده منه 


وربنا يبارك  فيه
يارب 

على فكره  الاستاذ محمد البدرى طيله تلك السنوات

لم يأخذ منى فلوس خالص

ولا قرش طبعا 

هههههههههههههههه
اخو صاحبه

ملحوظه
محدش يبلغ الوزاره علشان  الدروس الخصوصيه

___________________________________

الاستاذ عبد العظيم  صبيح

عملاق الراياضيات  فى جرجا 

جبل  بسم الله ما شاء الله 

رجل  انى احبه  فى الله 



هو  رجل رائع اكمل مسيره الاستاذ محمد كامل فى الرايضه بالنسبه ليا 

حببنى فيها 


جدا 
هندسه وجبر ياااااااااه

ذكريات رائعه مع  هذا الرجل 
كان   بيعمل مسابقات  ولوحه  شرف وجوايز  وغير كده كان بيغرس فينا  حب النبى

 صلى الله عليه وسلم  باخلاقه  

هو ليس بازهرى
ولكنه محب بحق

علمنا القواعد كلها الهندسه والجبر والنظريات  اغانى واناشيد  
حتى الان 

فى عملايه جمع وطرح الاشارات  

(متشابه نجمع  مختلفه نطرح واشاره الاكبر)


وغيرها 
من الاغانى 
والنظريات 
اخدت عنده  من اولى اعادى لغايه اولى ثانوى 

وهو للاسف مش متخصص شهادات 

ولو كان  متخصص شهادات لكنت اخدت عنده

واكملت الطريق معه
حفظه الله 
وبارك  فى عمره

______________________

فضيله الشيخ عبد اللطيف عشماوى

عملاق النحو 

ابو البنات 

المواد الشرعيه الواحد كان يقرا 

يجيب فيها 

فقه  حديث تفسير توحيد تجويد 


المواد الشرعيه 

مطالعه ونصوص وادب 
العقبه كانت  فى النحو والصرف

اضررت ان  اخذ مراجه فقط  فى الصف الثالث الاعدادى مراجه المنهجين  فى 10 
حصص

وكنت باذاكر  النحو والصرف من الكتاب وورق الاستاذ 

عبد الوهاب الشمندى رحمه الله 

رحمه واسعه 

اخذت الحصص عند فضيله الشيخ 

وكان  راجل محترم  الراجل ده تلوقتى فوق  السبعين  

واختى الصغيره  لما كانت عاوزه تاخد  درس نحو وصرف انا ذهبت  بيها 

اليه 

ورضى  رغم  كبر سنه 

مع انه مش محتاج بس

بيحب يخدم الناس وميرفضش طلب حد

يارب يبارك  فيه  يارب
______________________________________

انغلقت  المرحله الاعداديه  على المدرسين دول 

وبس والباقى اعتماد على النفس


والقران  كان حلو ليه  

علشان  تقسيم المنهج كان متغير كل سنه  وكان اخف من
الابتدائى فى الكميه المقرره 

والفقير كنت مواظب مع
المدرسين  فى المعهد الدينى 

والحمد  لله 

وكان لى النصيب ان اكون من اوائل المعهد  فى 
الاعداديه والحمد  لله_
_________________
الزى الرسمى كما قلت  من  قبل فى الحلقه الاولى من الذكريات
جلباب وطاقيه فى الاعدادى 

طاقيه  بيضا وكاناو يشترطوا علينا ان تكون زى الشعراوى بالضبط

ولبست الطربوش 

فى ثالثه اعدادى  طربوش المشايخ 

وكان كل مدرس يدخل يقولولنا يا مشايخ 

كانت ايام جميله

وطبعا رايحيين جاين  بالطربوش

فى الشارع فى الصبح  طبعا 

كنت احب ان امشى به


بس بصدق 


شعرت  انى اهينه  بما افعله

وليس عليا ان اهينه 

فكنت  اضعه  فى الشنطه وعندما 

ادخل الطابور 

البسه وفى الفصل كذالك ولما امشى فى الشارع على طول
فى الشنطه

---------------------------------
الثانويه

الاستاذ منتصر  اللبان

المدرس الاول لماده الفيزياء فى جرجا

حتى الان\

وربنا يارب يبارك فى صحته  يارب


كان مدرس الفصل عندنا فى المعهد 
طبعا فى الصبح

فى المعهد

وفى الليل 

عنده فى البيت 

ههههههههههههههههههههههههههه

كنا بنحترمه لانه دماغ وعرفت الدماغ دى لما دخلت  الكليه 

ربنا يكون فى عونه\
يااااااااااارب

الراجل ده رقم  واحد  فى جرجا عام وازهر 

وربنا اكرمه  بحب الناس 
ليه 
وفى الماده  بتاعته

وعلى فكره هو ساكن 

فى نفس  الشارع

بتاعنا

وحصتنا كنت  مسخره  طبعا كلنا عارفين بعض 

وايه دنيا  تانيه  بس علمنا وفهمنا وربانا 

ولما نزلنا فى الثانويه  وعدنا السنه  الفصل كله عاد السنه  فى ذاك الوقت الا القليل

برضو رحنا عنده نفس المجموعه

قالنا الورق معاكم

والشرح 


انتم حافظينه

قلنا كفايه  بنشوفك

قالنا كفايه  بشوف وشوشكم  فى المعهد
ارحمونى
هههههههههههههههه

يارب يبارك فيه  يارب
حصته كانت ب3جنيه  

سبحان الله 
معرفش وصلت كام تلوقتى

على فكره انا اخدت عنده فى تانيه  ثانوى وتالته
كمان
رغم انى كنت باخد  فيزياء فى تانيه عن الاستاذ محمد البدرى 
بس برضوا كنت باخد عند الاستاذ منتصر
_______________________


الاستاذ بهجت زوبعه

عملاق الكيمياء والمدرس الاول فى الماده  دى على مستوى  جرجا

برضو مدرس الفصل عندنا برضو

بس 


ده محدش يقدر ينطق معاه

شخصيه قويه  

الحصه كانت ب3جنيه 


برضوا 

برضو لما عدنا السنه رحنا ليه  برضوا نفس المجموعه

بس ايه 

لا يعرف طريق الابتسامه ابدا 

دماغه  شغاله معادلات 

فهمنى الكيمياء

بس مفكرتش انى ادخل علوم كيمياء ابدا

يارب يبارك فيه يارب

_________________________

الاستاذ صلاح

لا يحضرنى الاسم  كاملا 

بس انا اخدت عنده فى ثالثه ثانوى 

رياضيات

كان بيجيب لينا امتحانات   ثانويه عامه قديمه خالص وملخصات  لونها صفرا ويقول 

لينا  يلا حلوا 

الحصه  3ساعات او اكتر

ميمسكش الساعه  ابدا

لما يشبع  يقول لينا روحوا


برضو 3جنيه الحصه

بس ايه  
له الفضل عليا  فى انى فهمت ارياضه  دى لانها اقرب لرياضه  

الكليه  بالضبط

ونفس المجموعه 

وبرضوا 

لما عدنا السنه رحنا  له 

من تانى 

احنا ناس فاضيه
ههههههههههههه
جزاه الله خيرا عنا
___________________________


الاستاذ شعبان عبد الرحيم

هو اسمه كده مدرس فيزياء برضو  لما عدت السنه الثانويه
رحت له  علشان الفصل الخامس والسادس  فى الفيزياء لانى مش فاهمهم

خالص 
رغم ان الاستاذ منتصر شارح 

بس مش راضين  يدخلو اخويا مؤمن  ودانى ليه  لانه 

زميله 
فى المدرسه  بتاعته 


وسبحان الله 
انا حليت فىيهم فى الامتحان اكتر من الفصول التانيه
جزاه الله  خيرا عنى 

___________________________
طبعا 
كان فى حصص بتتلغى طبعا 


كانت الحصه ب3جنيه  وجنيه تصوير ورق يبقى 4جنيه 

وبما انى فى اسره متوسطه  من الطبقه المتوسطه او تحت
المتوسطه كان بيكون فى جيبى 

اتنين جنيه زياده 
وكمان خمسايه خنصره فى المحفظه 

كنت  باخرج محصن  علشان الظروف و وكده

بس لما تتلغى حصه على طول 
على النادى

نادى ايه

نادى جرجا الرايضى نلعب تنس طاوله 

ياااااااااااااااااااااااااااااااااااااه

لغايه   ما فلوس الحصه تخلص 
نتعب نروح ننام 

احنا كده اخدنا الحصه والحمد  لله 

ما فكرنا اننا نشرب سجاير 
او نعمل حاجه غلط
الحمد  لله 

____________________

الابله  ليلى 

للمره الاولى والاخيره 

انثى تشرح  لى بعد

الصف السادس الابتدائى 

الابله ليلى 

مدرسه الاحياء الاولى فى البلد 

محدش كان بيعرف يشرح  احياء 
غير 
الاستاذ ه
ليلى 

كانت الام انا كنت  باغلط واقولها ياماما

كنا  نحبها خالص 

تقعد معانا بالخمار 
وتشرح
وشوف انت بقى شباب صغنن فى طور المراهقه 
تشرح له 
احياء
ترويض الشرسه
روضتنا وعلمتنا

الى اهلنا لم يعلموننا  اياه

نصايح 

شد عزيمه  

رفه معنويات 


فهم  عميق للامورر الشخصيه كان
ت 
رائعه 
الوحيده اللى انا معرفتش اروح ليها بعد الثانويه حتى الان

 انا مش عرف اروح ليها اسلم عليها 

 لاننا كلنا مكسوفين منها


محدش راضى يروجح معايا على 

الاقل نطمئن عليها 

رحنا للمدرسين كلهم وبنقابلهم  فى الشارع كمان 
بس 
دى بجد 
انا معرفش عنها حاجه
يارب 
يحافظ عليها ويحميها يارب


------------------------------------
انتهت الرحله 
رحله المدرسين الخصوصييين
اللى اثروا فيا 
فى عقل وفكر محمود
المدرس ليه  تاثير كبير
فى عقل الطالب وقلبه
وان اذكر الاستاذ 
احمد المصرى  مدرس الفقه فى المعهد 
فى 3ثانوى 
وشرحه للفقه الحنفى باتقان 
ولفقه الحياه
وفقه الواقع
الناس دول 
مش هيتعوضوا 
فعلا الخير فى وفى امتى الى يوم القيامه 

يارب 
يكرمنا بما علمنا 
ويعلمنا العمل به 

والحمد  لله  رب العالمين
_________________________

هكمل رحلتى فوق الدراجه  فى ذكرياتى

فى وقت  لاحق
ان شاء الله 




هناك 13 تعليقًا:

جايدا العزيزي يقول...

بصراحه

اول مرة اشوف حد بيشكر فى كل مدرسينه وبيحبهم كده

ده دليل على انك انسان نبيل

حقا من علمنى حرفا صرت له عبدا

وقم للمدرس واكفه التبجيلا

كاد المعلم ان يكون رسولا

بس عجبنى مؤمن ايه مصمم انه يستعمر البيت


ههههههههههههههههه

والله محتاجين نتعلم اللغه الانجليزيه

وكمان استاذ محمد


لو تدينى عنوانه ههههههههههههه

وابله ليلى

اكيد قدرت تشكم البنين

مع ان النساء طيبين وقلبهم ابيض

بجد ده كرم من ربنا

بس ليه ما تفكرش تكتب مذكراتك من البدايه

بكل التفاصيل اكيد هتكون روعه

انا فكرت بس انت عارف مجتمعنا الشرقى

وفيه حاجات صعب اكتبها

ولو كتبتها انت عارف

اكتب انت وانا هساندك واكون دايما معاك

ياريت تفكر

تحياتى

re7ab.sale7 يقول...

ههههههههه
ثلاثة جنية في الحصة
انت عايز تموتني والا تشلني يا محمود
انت عارف انا بنت اختي ف ثالثة اعدادي مفيش حاجة اسمها دلوقتي درس بالشهر , الدرس بالمنهج كله يا باشا ...ومش هقولك بكام
هههه
بس انت كدة كاتب الاسماء بالثلاثي كمان ...هتودي الناس في داهية
عموما احنا بنحبك ومش هنبلغ عنهم
هنبلغ عنك انت

Ramy يقول...

بجد يا محمود

أنا مبتسم جداً

بجد ربنا يكرمك

و يوفقك فى الكلية

(:

و مش هنبلغ عنهم حاضر

أنت تأمر يا قمر

(:

تحياتى (:

الحب الجميل يقول...

عليهم افضل الصلاة والسلام
بسم الله ما شاء الله
لسا متذكر المدرسين واسماءهم
دا انا مش فاكرة غير اسم مدرس الرياضيات لانه عمى
هههههههههههههههه
ذاكرتك قوية يا محمود
مش نبلغ عنهم حااااضر بس كفاية ان انت اللى بلغت وفيييييييين على النت
هههههههههههههه
ذكريات جميلة
ربنا يوفقك يارب
ونبارك لك على التخرج ان شاء الله
تحياتى

BNT ELISLAM يقول...

محمود بص بقى من راى المتواضع والفقير والضعيفانى حاسه احساس غريب من لحلقه الى فاتت جدا وتاكد الحلقه دى بشده
بتفكرنى بطه حسين فى كتابه الايام وووصفه الدقيق جدا
لكل الى ان بيحصل واللى دانى الشعورد ده اكتر طريقه اللبس
ونت بتتكلم عن المدرسين والتدريس ونظام فى الحركه والله فكرتنى به على فكره انا من اشد ناس والمعجبيبين بكتاب طه حسين فى جميع المجلبلت وخاص فى كتابته عن زكرياته
وشعرتنى بنفسى انى ربنا كان دايما يوقفلى فى سكتى مدرسين كويسن
وبجد يابخت هؤلاء المدرسين انه لسه فى طلاب بتفتكر وبتنسب الجميل لاصحابها
عقبالى لما ابقى مدرسه ويتقى كلمه شكرا حتى



كده خلاص انا خلصت

خواطري مع الحياة يقول...

السلام عليكم
بجد اول مرة اشوف واحد يحب مدرسيه كلهم
انا بعرف ان بعض الطلبه يحبوا مدرس اثنين مش كلهم
ربنا يخليهم
بحيك على احترامك لهم ويارب يحفظهم
تقبل مروري
سلامي ليك.

mrmr يقول...

تعجبنى نظافه دماغك يا عبد الستار
ههههه
كل دوووول فاكرهم
انا بحسدك وبحقد عليك وعلى ذاكرتك بجد
بصراحه اول مره اشوف حد بيشكر فى المدرسين بتاعته
كل يوم البنت تجيلى تقولى استاذ فلان عمل كذا
واستاذن فلان عمل كذا
لما عصابى تعبت بجد
ده غير الدورس الخصوصيه اللى واكله المرتب كله ومفضيه جيبوبنا اول باول

انت شخص نبيل جدا يا محمود علشان فاكره ذكريات جميله لمدرسينك
ربنا يسعدك ويحافظ عليك

كلمات من نور يقول...

رحلة شيقة تمتعنا يا محمود

ساسو يقول...

ذكرياتك بتمتعني جدا
وماشاء الله يا حموده ذاكرتك قويه اوي
بمسك الخشب والله ههههه
انا والله ما افتكر اسم اي مدرس
او مدرسه ولا حتي الطلبه اللي كانوا معايا
كل اللي انا فكراه فعلا اسامي اصحابي
لان لو نسيت دولا هيبقي كده نداله جامده اوي
وفاكره اسم مدرس كان بيديني في تالته ثانوي اسمه محمد
دا اللي مش ممكن انساه
لانه صاحب فضل عليا بعد ربنا سبحانه وتعالا
ولا الدروس الخصوصيه
دي بقي الدمار الشامل بجد

بس بجد انت انسان جميل جدا والنبل بيجري في دمك

بس موضوع البلاغ دا
لا لا مش ضمنا نفسي
مش عارفه هعمل ايه
ههههههه

Noha Saleh يقول...

ماشاء الله على المدرسين الكويسين
فعلا لما يكون الانسان كويس سيرته تتذكر بالخير
ورغم انى اسمع ان التعليم الازهرى صعب جدا لكن واضح ان مدرسينك هونوا الرحلة عليك

محمد التركى يقول...

السلامو عليكم

يااااااااااااااااه
ايه ياحوده
ده انته اصيل ياجدع قووووى

وعندك اصل بجد
انك تتذكر مدرسين بالكم الكبير ده
وتفاصيل كتير
ههههههههههه

تسلم ياحوده
ربنا يارب يوفقك

تحياتى لقلمك وقلبك المخلصين

محمد التركى

richardCatheart يقول...

والله جميل اوى يا محمود ماتتصورش سعادتى وانا بسمع كلامك عن مدرسينك بالرغم ان واضح انك صغير ممكن عشرينات يا عنى الكلام دا من قريب مش زى حالاتنا زمان
ياعنى كانت العلاقه لحد قريب بين المدرسين والطلبه لسه فيها احترام وتقدير ورمز وقدوه

بجد تحياتى ياحوده

الا جبتنى على ملا وشى فى بوست قلبى حبيى ولا ايه مش فاكره
فين البوست ياحج محمود ههههههههههه

تسلم ايدك واشكرك انك ديما بتفتكرنى

شمس النهار يقول...

هو انت كاتب الملاحيظ بالحبر السري يامحمود


طبعا المدرس اكتر شخص بيحبب او يكره التلميذ في الماده

كمان بيساهم في تشكيل شخصية التلميذ اكتر من اهله

مستنين مذكرات الجامعه
:)