الجمعة، 3 سبتمبر، 2010

عبد الوهاب عصام اسألكم الدعاء له؟؟+تخاريفى الخاصه


السلام عليكم
كل سنه وانتم طيبين 
فاكرين اخويا الكبير عصام 
انا دايما باقولكم يا جماعه ادعوله 
علشان الظروف اللى هو فيها 
تلوقتى 
حاجه ظهرت  
اخى عصام عنده ولد وبنت 
البنت نور الهدى 
عندها5سنين
وفى كىجى2
الولد الصغيور ده 
اللى صوره فوق دى
هو ده عبدالوهاب 
عصام او دلعه 
بودى بودى كده حته من قلبى 
شقى وعمرم ما بيسمع الكلام خالص بينفذ اللى فى دماغه  
وبس ورغم انه عنده3سنين بس 
بس عنده حنان الام بجد 
مش هو اللى يقعد  فى حضنك ده
كان زمان على ايامنا ده بقه 
انت تقعد  فى حضنه ويلعب فى شعرك 
ويبوسك فى راسك 
يااااه ويقولك دى بوسه بطعم المانجه
ودى بوسه بالفراوله 
ودى بوسه باللبن 
الوس كمان اخترع ليه نكهات 
ولما يتغاظ منك  
ومتجيبش اللى هو عاوزه يضربك ويقرصك ويعضك 
ويبوسك برضو
ويقولك دى بوسه 
بالبيبى والاوف والقرف كله والحمام 
تقوله ليه يقولك انت وحس (وحش)
وانت مس بتحبنى
ولد زى العثل 
لما يغلط متقدرش تضربه علشان على طول يجى ليك ويقولك انا اسفه
مش انا اسف لآ
 صعيدى ويقول انا اسفه علشان طبعا البيئه كلها اللى كان قاعد فيها والدته وخالته وجدته واخته كلهم بيتكلموا بصيغه المؤنث بالضماير  عنده
واخده لخمه شويه لآ شويتن تلاته
حافظ الابجديه الانجليزيه كلها 
ومن 1 لغايه عشره 
ويلعب هو واخته 
ولما حد يعمل غلط 
فيهم رغم كل الحب
يفتنوا على بعض
ولما حد يضرب فيهم التانى يعيط
عليه 
وسضرب اللى يضرب اخوه 
رغم انه هو اللى فاتن عليه
والله يارب يخليهم لمامتهم ويقوم بابا هم على خير
المهم 
الولد الحلو ده بيمشى مشيه مش مظبوطه خالص مالص
فى زكه صغننه  فى رجله 
الدكتور بتاع العلاج الطبيعى اللى بيجى لعصام 
شافه فقال 
لازم تعرضوه على دكتور عظام 
رحنا لدكتور عظام  الحمد لله على كل حال قال لينا عنده 
كساح
ربنا يعفوا عنه
واعطانا تحويل على دكتوره غدد
اسمها الدكتوره ايزيس غالى 
اعطتنا اشعه وتحاليل لازم نعملها 
عملناها قالت لينا الولد عنده 
هشاشه عظام 
ولازم ياخد ادويه طول حياته
ويتصرف الدواء من عند مستشفى ابو الريش 
علشان مش بيتباع بره  المستشفى 
يا أخوانا اسألكم الدعاء للولد ده لانه غالى علينا كلنا 
وعلى كل اللى شافه 
ماماوبابا زعلانين عليه خالص والله 
ولا نملك له الا الدعاء 
بالشفاء
بنفكر نروح لدكتور تانى 
بس خاليفين ندخل فى متاهه الدكتاتره
وكل واحد فيهم يكتب علاج شكل
وتشخيص شكل
اسألكم الدعاء
بارك الله لكم
--------------------------------------------
لا تنسوا ان تزورونى فى مدونتى التانيه 
قلبى حبيبى
_________________________________________
تخاريف الشهاب