الثلاثاء، 17 أغسطس، 2010

العريس مش بيصلى والعروسه بتشرب شيشه وشويه لغبطه.......!


السلام عليكم
معلش البوست ده فيه شويه لغبطه او لخبطه اللى يعرف التهجأه المناسبه يقولى
شويه افكار متلغبطه ايوه كده صح بالغين مش بالخاء
اولا
حصلت معايا
معايا اخت صغننه لسه متخرجه من تربيه واداب فرنسى
طبعا على وش زواج كل شويه عرسنا اشكال والوان
ولما كنت موجود  اتقدم  واحد شاب بصراحه مستريح وعنده شقه  وشغال وكمان عنده مشروع  فاتح محل صغنن بجوار شغله الاساسى  فى الحكومه وكمان دروس خصوصيه يعنى هيعرف يعيشها ويأكلها عيش المهم فرحنا بيه قوى لان اختى دى  اموره العيله كلها وباحبها قوى طبعا وكل اخواتى ولاد وبنات علشان مضربش فى الاخر
الشاب ده  فى سنى او اكبر حبه يعنى ممكن اسأل عليه انا بما انى يطلق عليا اسم شاب ومع انى مش حاسس بالشباب ده خالص لازم ادعبس عليه وسط الشباب بيعمل ايه
حقيقته  ايه ومحدش يعرف سر الشاب غير الشاب اللى زيه
المهم
سألت ودعبست ربنا اكرمنى بواحد جاره  زميل ليا من الابتدائى وميخبيش عنى حاجه ابدا
وواحد كمان فى الشغل بتاعه صديق ليه ويبقى زميلى  فى نفس الوقت بس العريس ميعرفش كده
علشان اصلا ميعرفش اخوات العروسه ايه المهم


عرفت انه بيشرف سجاير وشيشه وكمان ايه مفيش مانع من بانجو حشيش
كده ميه ميه
ليه فى البنات وخطب اكتر من مره وكان يخرج ويدخل وبعدين بومبه كبيره
المهم
كان رأى البيت الرفض التام ليه؟

طيب الاخلاق زفت
دى شهاده  الزميل والصديق ليه
وتم الرفض طبعا
المناقشه؟
-----------------------------------------------------
1-تم رفضه علشان السجاير والشيشه والحشيش
طيب معظم شباب مصر بيشرب سجاير وشيشه وبانجو
ومعلش بقه والبنات برضو
بلاش نحكم كده بالرفض ممكن الزواج يخليه يبعد عن ده كله بضوابط
معاه ومع اهله
طيب لو كان اهله مش محترمين والاصلف مش طيب
المشكله  فى الخطوبه والفسخ
كل البنات كده محصلت توفيق
ممكن بعد الزواج ينصلح حاله
طيب ممكن بعد الزواج البنت تتبهدل وتطلع عين ابوها وتحصل على لقب
مطلقه بكل فخر وتنضم الى الارامل والعوانس ومحدش هيبص عليها
خليها  فى بيت ابوها احسن
يعنى ايه مش بيصلى ممكن ربنا يكرمه وينصلح حاله
يابنى حال الولد من صلاحه ودخوله المسجد
واللى ميخافش من ربنا مش هيراعى حق العبد
يعنى ايه اخلاقه وحشه ممكن ربنا يكرمه والعائل  على البنت
طيب انا هرمى اختى ليه خليه  فى بيت ابوها معززه مكرمه
---------------------------------------------------------
طبعا ده كان النقاش اللى بينى وبين نفسى وبين الاهل وكده وتم الرفض ايه رأيكم
؟
-----------------------------------------------------------------
يا اخوانى الاولاد حالهم ميسرش اللى شيفينه قدامنا زى الزفت
مش زى ما اتربينا  فى بيوتنا خالص من الاخلاق والالفاظ اللى زى الزفت انا باتكسف لما اكون مع ماما او اختى وراكب مكروباص يقوم السواق يشتم شتيمه زى الزفت وبعدين يقول  معلش ياحريم  ياللى معانا مخدش بالى
ده غير الالفاظ اللى فى الشارع فى كل مكان بحس انى غريب  فى الشارع وفى كل مكان
_________________________________________________






انت يا عريس لو عرفت ان عروستك بتشرب شيشه مثلا او كانت بتحب حد قبلك
او ليها علاقه قبل كده وعرفت من من قبلك واحد هتعمل ايه؟

____________________________________________

الخطوبه انا شايفها فيها تجاوز هنا فى القاهره بصراحه الواحد يدخل بيها ويخرج وممكن تجاوز شويه اللى انا شوفته
مش زى عندنا مثلا
\العريس هنا اللى انا شايفه انه مش بيراعى العروسه  فى الخطوبه مش بيحافظ عليها من ناحيه الشكل العام
بيمسك ايديها او بيكون لوحدهم من غير محرم
ممكن اكون معقد شويتن بس مينفعش
لازم يحافظ عليها زى اخته لغايه عقد رسمى

ياه رأيكم فى الوضع العام للخطوبه  فى مصر؟؟؟؟؟


 
______________________________________________
يارب ارزقنا العفاف
يارب
ويسر امور الزواج للجميع
يارب ياركريم
وكل سنه وانتم طيبين