الجمعة، 28 ديسمبر، 2012

خنقه

الخنقه صعبه  الدنيا وحشه

لما  الدموع  تتحبس 
وادور على صدر  اعيط فيه
ولا  حتى  مخ يفهمنى 
او  حتى قلب  يحتوينى 
والهم والغم  مالى  قلوب  الناس
 بحاول  اهرب  منى مش  عارف بحاول 
انى الاقينى  افهم  نفسى  مش  عارف
انا  عارف انى فيا حاجات  غلط كتير  قوى 
مش  تعد  ورايا 
انا عمرى  راح فى  حاجات  ملهاش  لازمه وكنت اظن  انى  ميه ميه 
اللى  حواليا ساعدونى  على  تدمير نفسى
الدنيا  متلغبطه انامش  زى الشباب  خالص 
الدنيا  متلغبطه خالص  نفسى  ارسم  الطريق  اللى  امشى  عليه
نفسى يكون صح 
عارف ان  الحاجات  اللى  اتمنعت  عنى  ممكن يكون
فى  المنع  خير\ بس الدنيا وحشه
محدش بيحب  حد ولا بيساعد حد
ولا  يمسح  دموع حد
سحقا للدنيا
وما فيها 

يارب  فرج  عنا  الخنقه 
يارب


السبت، 8 ديسمبر، 2012

الطف يارب بمصرنا

قهره وكسره نفس
ودم راح  وارواح ملهاش تمن

لما الاقى  دم  المصرى يهون علشان  حته  كرسى تبقى سفاله  ودى مش  الديانه اللى بيدافعوا  عنها
ولا  الدين  اللى  احنا  بنستدين بيه
الدين برىء  من اللى أأمر  بالدم
يسيل  والناس  تموت  من الطرفين
وكمان متاجره بالدم  والجثث
حاجه  عقيمه 
حاجه  سفاله
ملهاش  وصف
الدم المصرى  حرام
سلفى  كان او  اخوانى او  ليبرالى او  نصرانى  او يهودى او  حتى كافر
بدون حق

افهم يا ريس وخليك مصرى  مش  ريس ليهم وبس
احقن الدم بالحق  مش بالتدليس  والكدب

اصحاب  زعلوا  منى  علشان بدافع  عن الدم
انا مش علمانى انا مسلم
انا  مش ملحد
ولا  كافر
بلاش  نتاجر بالدين  احنا  خسرنا  كل  حاجه مش  باقى  معانا غيره
بلاش سفاله  اكثر  من كده
خدوا  الكرسى  وخدوا  الحكم بس بلاش  نتاجر بالدين
ونكفر بعضنا 
ونقتل  بعضنا
يا مصريين
يا مصريين
بلاش  نتفرق  حتى لو رئيسكم  خان
بلاش  نتاجر بالدم
والدين
يا مرشد  ويا شاطر وياريس ويا برهامى  ويا برادعى يا  حمضين  يااااااااااااااااا
يا  قوم
الدم ده كله فى رقابكم
ياقوم  ابنوا  البلد بايد  واحده
مش  كهنوت  باسم  الدين
اتقوا  الله فينا كفايه  دم
انا  عيطت  من  خطاب  مرسى
وعيطت  على  اللى  ماتوا  واللى  نسبوهم ليهم  واللى  قالوا  عنه انه شهيد واخوان  وهو مصاب  ولا  اخوان
والدبلوماسى  وعلا شهبه  واللى  ماتوا  من الاخوان باسم  الدين
ليه  كده ليه  ليه الدم ويقول  لو  عندكم ادله قدموها  الدليل  السكوت عن
الدم
وكلنا  شهود  على اللى بيحصل  وكلنا  هنتحاسب
يا اخوانا  مش  ابو  اسماعيل  اللى  هيحرر مصر  من الكفر 
ولا  مرسى اللى يحرر  فلسطين
حرروا  بلدكم  من الفقر  والمرض 
حرروا  بلدكم من الجوع  والفقر
اتقوا  الله فى  البلد
مصر  محتاجانا 
بلدنا  محتاجانا

مش  لاقى  كلام  غير  قلب  مقهور  على  البلد ودم
هيسيل  اكتر
باسم الدين
وريس  اطرش واخرس  واعمى 
ولا فارق  عنده الدم  وشباب
بلده بيتقتلوا تحت شباك  قصره
باسم الدين والشرع


كل  ما  اقول  انى  هعتزل  انى  اتابع  السياسه
الاقى  مصايب
واتهمونى انى باتصيد الاخطاء  وهى  عيانا بيانا
مش  عارف  لغبطونى  حتى فيا
مين  الصح ومين  الغلط
ومين  اللى فتن  الفتنه
ومين  صاحبها
ياربى
الطف بمصرنا




الأحد، 2 ديسمبر، 2012

فى ناس الحزن راكبها


نزلت  من المترو وركبت  مواصله  بسيطه  
كده اجرتها حوالى 75قرش 
ولميت  الاجره  واديتها  للسواق  وانا  اصلا مش بحب  الم  الاجره  خصوصا
لو فيه باقى  ربع  جنيه 
واللى بيركبوا  مواصلات زى حالاتى عارفين  المعاناه
بتاعه الربع  جنيه
المهم لافيت  الاجره  للسواق  
وقالى  ناقص  واحد لاقيت 
واحد بيقول فى  واحده مش  دفعت
قالت مش  معايا فلوس 
مش  معايا  فلوس 
ووشها احمر  
وبتبص فى  الارض 
قلت ادفع انا  خفت  حد يفهمنتى  غلط قام  راجل  كبير  دفع

ليها السواق قال  لآ   محدش يدفع لها  
بصيت على البنيه 
لاقيتها  محترمه لبسها  محترم زى 
اى  بنت فى  مصر  على وشها  حزن والم  كبير  قوى 
وماسكه شنطه كتف  باين قوى  انها فاضيه 
نزلت  وهى  نزلت قلت  اديها فلوس  من اللى  معايا  
خفت  تفهمنى  غلط وحقها  تفهم  اى  حد  غلط 
صعبت  عليا قوى قوى 
معرفش قصتها ايه  ولا  راحت فين  ولا  عمرى  ما قبلتها  تانى
ولو قابلتها  مش هعرفها 

فى ناس الحزن راكبها

والفقر  واكلها ومحدش  حاسس بيها  دى مثلا  ايه قصتها  محدش الله اعلم بيها 
فى  حاجاتت  كتيره  بتمر علينا فى  حياتنا 
وكل واحد  مشغول فى  كوكبه  
وانشغالاته 
الاخوان  السلفيين 
عبدالله بدر  بيشتم  ولسانه طويل 
خالد عبدالله  لسانه  اطول  البرادعى  الهولوكوست  
بوذا الطياره الهيلوكوبتر 
وناس  مش لاقيته  تاكل 
وبرضوا بتاحفظ على  كرامتها 
وشرفها
محدش بيبص  لتحت 
يا  من  تتشدقون بالدستور 
والشريعه 
وتصرفون  الملالين فى  اتوبيسات  تلموا فيها  الناس  بالاجر  او غير  الاجر  وتأجرون 
طائره  للتصوير 
البشر للكثره فى ناس 
مش لاقيه  تمن العلم  اللى بتوززعه
وفى ن اس  مش لاقيه  الخيمه اللى  حضرتك قاعد معتصم فيها
فى  التحرير
وفى  ناس مش لاقيه  تمن  البدله اللى  حضرتك لابسها
فى  الحوار ولا  تمن  الساعه اللى فى ايديك
مش  علشان يلبسها 
لا  علشان ياكل  بيها 
فى 50 فى  الميه  تحت  خط الفقر
وثوره الجياع قادمه 
ثوره الجياع قادمه 
اتقوا  الله  فى  اللى  الناس  اللى تحت
حفاظ  البنت  دى اللى بحكى عليها  على شرفها 
هو حفاظ على الشريعه اللى 
بتنادوا  بيها
ومحاوله  دفع الراجل  للاجره  ده تطبيق للشريعه 
وعدم  اخذ  السائق
الاجره
\ده
تطبيق  للشريعه
شريعتنا  متربين عليها كعرف  مجتمعى  مش  كهنوت  لازم  نعمله  
ده بالفطره والاسلام فى مصر من زمان قوى  مش  لسه هيدخل
ونحن فى  رباط  الى يوم الدين 
بصوا  شويه للناس  اللى  تحت
وكفايه كفايه بقه
والله الناس  مش  لاقيه  تاكل 


الأربعاء، 28 نوفمبر، 2012

الرومانسيه من وجهه نظرى

حمله التدوين  الاسبوعى  

ــــــــــــــــــــــ
الرومانسيه

فاجئاتنا  اختنا  شمس  النهار الرومانسيه شمس النهار بتدوينه عن  الرومانسيه

ونصحتنى ان  اكتب  عنها

وهحاول  انى  اعبر  عنها  من وجهه نظرى  

بالرغم انى  عامل  مدنه صغونه بحب فيها على  روحى  
بلغبط وبشخبط فيها  نبض روحى

يعنى ايه رومانسيه 
الحب 
والرومانسيه الاتنين بيكملوا بعض  
الحب  هو  ان  اتنين  يلاقوا بعض
يكملو بعض
 ده بيكمل  ده زى  كده  حله وغطاها 

شكل  تكاملى  عقلى  وروحى  وعاطفى  وفكرى
 يتلاقوا فى  امور  عديده

عديده  مش  ششرط يتلاقوا فى  كل  حاجه

ممكن يتلاقوا فى  حاجه  وحاجات  لآ 

بس  بيكملوا  الطريق  مع بعض

والاختلاف  فى حد  ذاته  رومانسيه 

انى  مختلف  معاها فى  ذوقها  مثلا 

بس  ممكن  اتنازل  علشان  خاطرها

وهى مش  تكون اووفر  علشانى  

هى  مختلفه  معايا  فى المكان الفلانى
اللى نفسى  اروحه  

هى  تجى على  نفسها  علشان خاطرى  وانا  كمان  

مش  ارخم عليها  واروح نفس المكان علشان  ارخم عليها اكتر  

الرومانسيه  مش شرط  يكون فى  رغد من  العيش  

ولا   بيت  كبير  وجميل  
ولا  دخل  كبير  ومرتاح 
ولا  عربيه  جديده كل  سنه
ولا  مصيف  شكل  كل  صيف
ولا  خروجه  اسبوعيه  ولا  حتى شهريه
ولا  كل  شهر  هديه 

ولا  دهب  ولا الماظ  
ولا  مظاهر  اجتماعيه فى بعض  الاحاين
بتكون كاذبه 

الرومانسيه  فى العسر قبل  اليسر  
فى الضيق قبل  السعه
فى  الفقر قبل  الغنى  

ما اجمل  الرضا بالقليل  بين  كفوف  من  تحب

ما اجمل  الرضا  
باقل  ما  تقدم لمن  تحب 

وده فعلا فى وقتها بيكون اكبر  ما تستطيع ان 
تقدمه لها

ان  تراعى  تعبها  وشقاها
ان  تقدر قلقها  
ان  تقدر  حبها لك  حتى  وهى  غايبه عنك
تقدرها  فى  غيابها فى  كلامك
عنها فى  غير  وجودها  
فى  انك  مش  تعمل حاجه  تزعلها  

وتغضبها
مش  خوف  منها
لا  خوف  عليها  انها  تزعل  منك 
او  تجرحها  حتى  ولو  انت
عارف  انها  هتسامحك
الرومانسيه  مش  تستغل  طيبتها 
او  سذاجتها   او  هبلها  او  عبطها  

ما دام  هى مقدره  تعبك 

ومش  بتحملك فوق  طاقتك
وبتعينك 
وبتصم  ودانها  عن كل  حاجه  تجرح فيك  
ومش تشوف  ضعفك
ولا  خضوعك فى بعض  الاوقات
او  تراخيك 
او ياسك
حتى لو شافت  ده
 فيك  تدفعك الى  الامام 
مش  تكسر فيك
او  انها  تعملك  كسره كمان
لا  بتخليك  راجلها  بالقول  والفعل
بتقف  وراك
ومش  بتحسسك 
انك  ضعيف
 بتدعمك
بتقويك  بالافكار  والكلام  وبقوتها  وطاقتها
المهم  انت  تكون  تستاهل  
لما  انت تعيط  تحتويك  بدراعتها  ومش  تشوف عنيك 
ولا  دموعك
العياط فى  حضنها يكون قوة  
مش  ضعف  
مش  اذلال زى ما  بيقول  البعض
كل ده  قشه فى  معنى  الرومانسيه  من  وجهه نظرى 

ميكس  جميل  
المهم يتوافر فيه  الصدق  والاخلاص
والنيه  الطيبه 

السبت، 24 نوفمبر، 2012

بلاص عسل وبلاص مش

بقابل  ناس فى  حياتى  كتير  

عباره عن  حبه  بلاليص

مره  الاقى  بلاص  عسل  

اخده منه  ومش بمل  منه ابدا  

ومره  الاقى  بلاص  مش  بدوده  

اه والله بدوده  ويكون من  زمن  فاااااااااات 

ساعات  بكون محتاج  المش  علشان  مش ينفع

اكل  عسل  على  طول  

بس  فى حاجه  كده  

فى  واحد  بيكون فاكر  نفسه بلاص  عسل  

ويديك فى  العسل لغايه  ما  يلازقك 

وهو  اصلا  بلاص  مشض  وهو مش  عارف  ودى  مصيبه 

مصيبه كبيره قوى قوى  

ويكون فاكر  نفسه  انه  خفيف  وظريف  

ودمه خفيف  وهو  دمه يقطع الخميره من البيت

حتى لو  فى  حد  عاتبه  
او  حتى  نبهه 

برضوا  مش بيفهم  بعيد عنك

وفى بلاص  بيكون  عامل  فيها انه  تقيل  وبيخاف  على مشاعر اللى حواليه  
مش بيحب  يتلقق على  اللى حواليه

كل  كلمه بحساب  لانه
خايف  على  اللى  حواليه 
ومش عاوز يجرح  حد 

ولا  عاوز يزعل  حد  منه 
وهو فى الاصل  عسل 

وعسل  سايح  منه  كمان  

بس  فى  مقلب  كبير 

ان فى  مواقف  لازم  تكون  بلاص  مش  
مملح  
وفى حالات  لازم  تكون بلاص 

عسل  نحل  مكرر

محدش  يقدر يكون  يمين على  طول
ولا شمال  على  طول 

ياريت  نحاول  نمسك العصايا  من النص 

لا  تكن لين فتعصر

ولا  تكن  صلب  فتكسر 

ويارب  يقنا شر  تلزيقه  بلاليص العسل

وملوحه بلاليص  المش

انت بقه
شايف  نفسك

بلاص  مش
ولا  بلاص  عسل؟


.......................

مدون نبض روحى  

الجمعة، 23 نوفمبر، 2012

اسف يا مصر انى انتخبت مرسى وعملت ثورة

الامل  قتلوه بجد 

قتلوا  حتى  التفاؤل فى اى  انسان  عنده امل

حتى الامل اصبح مستحيل 

بعد حبه خفافيش  فجاه فوجئنا  انهم موجودين

وبيقولوا لينا  لو مش عجباكوا
 البلد
امشوا
وسيبوها وهما مش  عارفين ان  البلد  بلدنا  احنا 

والاغنيه المشهوره
الشارع لينا  لينا لوحدنا والناس  التانيين  دول  مش مننا

دول  ناس  انانيين 
انانيين
انانييين
انانيين
مش  عاوز اتكلم فى السياسه 
وهقتبس  حته من  مدونه قريتها  من  حبه 
لو    اتكلمنا فى  السياسه كلنا  هنخر سياسه

وكفايه اللى  بنشوفه فى  القنوات والاعلام

واللى فينا  مكفينا 

يا مرسى  يا قاتل  الامل فينا 

يا مرسى  يا  من خذلتنا  

يا مرسى  يا  من  اثبت نظريه  
انك بتاخد تعليماتك من المرشد  
والشاطر  وفى روايات اخرى 
امريكا  وهيلارى 

يا مرسى 
ليه كده بتناقض  كلامك  يا مرسى 
ليه يا مرسى  تعمل  كده  
اتقى الله فينا يا مرسى 

تعالوا  هغلس  على  اللى هيقرا التدوينه  دى  واغلس على  نفسى وعلى  مرسى  ومش هطول علشان الملل مكفينا 
السؤال  الاول؟
هو مرسى رئيس الاخوان  والوهابيه وبس
؟
ايوه وهابيه  اسمهم وهابيه  مش سلفيه
احنا سلفيين وحصر  كلمه السلف  على فئه معينه يبقى 
الدين  محصور  عندهم  لوحدهم احنا 
سلفيين
فى  الازهر  سلفيين  بنصلى  ونصوم ونتجوز كله زى ما  وصلنا عن سيدنا النبى  
دول  وهابيه  
وهعيد واقول  وهابيه 
المهم  هو  مش ليه شعب  يخاطبه 
طيب الشعب
 ده مش ليه  تليفزيون بيدفعوا مرتبات  اللى فيه
من ضرايبنا احنا
طيب  يا مرسى
مش  هتخطب لينا  من تليفزيونا ليه يا مرسى
؟
رمال  بتتحمى بمؤيديك ليه يعنى؟
علشان  ايه فين  فتحت صدرك فى التحرير  ياعم انت قولت  ان رئيس لكل المصريين فين بقه فين؟  فين  خطبه  المعارضين بقه المفروض  تروح  لشارع  محمد  محمود
ياعم اعمل   تهدئه  ووافق  ان  الدخليه  تحط  تجسسات  على  الحدود   فى  الميدان  زى  اللى  وافقت  عليها 
اسرائيل  انها  تحطها  على  حدودنا  والخبر فى  الاهرام يا مرسى 
اعتبر  ان  البلطجيه اللى انت بتسميهم بلطجيه  دول
  غزه  والشرطه اسرائيل او  العكس ياعم  
وابعت  اى  حد يهدى  الوضع  ياعم  مرسى  عيب  عليك
عيب  عليك والله 
عيب  عليك  قوى  
مش هتكلم على قطار اسيوط  
وانت بكلامك فى البرلمان 2003  طالبت بتغير الحكومه ومحاكمتها  
وانت لما  بقيت رئيس  مش  عملتها 
يا راجل  دول  50  طفل  وطفله  ولا حياه لمن تنادى  
فين اسعافك الطاير يا  مرسى اللى  صفحات الاخوان  خوتونا بيه؟
فينك من صعيد مصر المطحون ؟

مش  هتكلم  كتير  علشان اكمل  بس  
...........................
السؤال  التانى ؟
ياعم  مرسى الله يهديك 
التأسيسيهتعبر  عن مين  بقه الله يكرمك؟
وانت  مين علشان تحصن قرارتك بالصلاه على النبى ؟
ؤمال فين  كلامك قومونى  وعلمت فيها  عمر  ابن الخطاب  
وفين  الميادين مفتوحه  وثوروا  علي
فين ياعم كلامك فين ياعم  كلامك الحنين  مع محمود سعد 
اتقى الله فينا يا  مرسى
 فرحنا باقاله النايم العام
بس  مش تجيب  لينا  جوز  اخت  وزير العدل  ونائب الرئيس 
يا مرسى 
يا اختى عيب  سكتنا  على صهرك  احمد فهمى انه رئيس  مجلس  شورى  جماعه الاخوان  اقصد الشورى  
تلوقتى  هتجيب  ده  وجيبت  السيسى اللى  عمه 
عضو  مكتب ارشاد
ايه  ياعم  ده 
ايه ياعم  وحده وحده علينا  الله يكرمك 
تعالى فى التأسيسيه الله يخليك يا مرسى 
دى بتعبر  عن مين  اصلا؟
قولى كده بتعبر  عن مين.؟
عن مين ؟
عن  مين.؟
مع احترامى للجميع اللى فيها
ام  ايمن؟
الدبلوم معاحترامى ليها برضوا
؟
ةلا برهامى  اللى  بيطابك  بشروط  تحالفك مع الدعوه السلفيه بتطبيق  شرع الله؟
هو احنا  كفره  والعياذ بالله يا مرسى؟
قولنا بس  
وتصلى  بعلماء  الوهابيه  
ودايس  بالجزمه على  الازهر 

يا عم  المؤسسه الشرعيه  للدين الاسلامى  الوحيده  فى  مصر  هى الازهر
المفروض  تقوم بيه  مش  تهمش دوره
ياعم عيب  عليك
عارف
انك  بترقد للازهر  وعاوز تفككه  
واكيد مرقد له على  كام قرار  من قراراتك
بس  ياعم الحاج  فعلا  خذلتنا 
تعالى بقه مين اللى بيعبر عن الشعب فى  التاسيسيه؟
اللى اسمه الازهر اللى عاوز يزوج البنات فى سن 9سنين؟
ولا  مين بس
؟
ولا بكار  ؟
ياع م  مرسى
 هى ايه  فايده عمداء كليات الحقوق  واستاذه القانون  الدستورى فى مصر؟
ياعم  اعمل  واحده وجيب الناس  ددول ياعم
مش  ناس  تلاقيهم مش يعرفوا  اللغه الانجلزيه حتى  وممكن يكونوا  
مش بيعرفوا  يكتبوا  كماله عدد
ياعم مرسى  اتقى الله فينا
اتقى الله فينا 
..........................................
الاعلام المضلل من تقصد؟

مرسى  مش اعلامالفلول  اللى  انت  طلعت
على  معظم  قنواته 
وخطبت الشعب المصرى  من خلاله

اعوانك بيطالبوا  باغلاق  القنوات 
دى
طيب  وخالد عبدالله
ووجدى  غنيم 
؟.
والشحات  اللى بيقول  الديمقراطيه كفر

ولا  ..ولا........ولا.........

بلدك عاوز تنضيف
نضفها
بدماغك مش بارشادات ونصايح ناتجه من تحالفات
على قفا
شعبك
الحق  نفسك
قل  ما  فعلا  تترمى فى  مزبله التاريخ
......
كنت الامل
وعصرنا  على  نفسنا  ليمون 

فعلا
قالوا  لينا  هتندموا

وجه وقت الندم

اسف
 يامصر
انى  
انتخبت مرسى
واسف يا مصر
انى  كنت
فى  جيل
 عمل  
ثوره  سرقوها  مننا اصحاب الغتر 
واللحى
ولا عزاء
للشهداء

اسف  على  حده الكلام

الثلاثاء، 20 نوفمبر، 2012

امبراطوريتى الصغيره


السلام عليكم 

تدوينه  الاسبوع 

فى  حمله التدوين الاسبوعى 

وعلى فكره  اللى يدخل  هنا  مش شرط  يسيب  تعليق اللى يعلق  اهلا  وسهلا
واللى مش يعلق  برضوا  اهلا  وسهلا 
ـــــــــــــــــــــــ
امبراطوريتى  الصغيره

زمان بقه زمان  خالص  مالص
يعنى يجى من 3سنين كده اقل  حبه اكتر  حبه مش فاكر 
عملت  مدونه باحث  عن حب  
هتكلم  فى الموضوع ده 
سر  الاسم؟
سبب  التدوين؟
وسر  الاستمرار  والتوقف؟
واى  حاجه هتجى على بالى  بعد حبه كده

سر  الاسم.............

ايام المنتديات بقه 
كنت مجنون  بمنتدى  اسمه  منتدى  مجانين

وكنت  من العاشقين له  وكان  تابع لموقع  مجانين 

وهو  موقع صحى  نفسى  اسلامى  وكان  موقع  ممتااز وما زال كنت عضو فى  المنتدى باسم باحث  عن حب 

وعشقت الاسم  وهو  البحث عن  حب  حب  كل حاجه فيها  خير  وتقديمها للناس  صحيح  كنت بتفهم  كتير غلط لانى مش بدور  عن الحب  وبس بل الحب  بكل معانيه الحسنه 
وبعد كده  كان فى  عضوه اسمها بوتا 
العضو دى  كانت عامله مدونه 
الحنين للذكريات  
وكنت  مجنون بكتاباتها  وقلت لازم اعمل مدونه  زيها

وعملت  مدونه قعلا بس  معرفش اتفاعل 
خالص 
وبعد كده عملت المدونه 
اللى بشكلها  الحالى
ـــــــــــــــــــــــــــ
سبب  التدوين 

التدوين له اسباب  كتيره  جدا جدا جدا

منها خالص  ومنها  عام ومنها سرى  
والمدونه حاجه شخصيه  جدا بس  بتكون مشاع 

بمعنى  كل  واحد بيسقط اسقاطاته على صاحب المدونه زى ما  هو شايفه  او فهمه  وده من وجهه نظرى  غلط

المهم 
السبب  العام  فضفضه 
اكتر من المنتديات اللى  تم هجرها 
برضوا والناس طفشت  منها 
من  المدراء  اللى بتحكموا
بالناس وكده
وكنت  كاتب  كام خاطره  كده

فى  كذا  منتدى  قلت  لازم  اسجل  بقه حركاتى سكاناتى  دموعى  ضغوطى  النفسيه اللى  بمر  بيها 

وطبعا  خلال  الثلاث  سنوات  اللى فاتت  مررت باسوء مرحله فى حياتى  مش عارف  اوصفها بس  انا لسه مش  خرجت من دوامتها حتى  الان 

متنفس باتنفس  منه  على  البشر اللى حواليا

واتعرفت على بنى ادمين حلوين 
وهحكى  عنهم  او بعض  منهم

عارف  ان بعضهم  هيزعل  منى 

بس  لو كانوا  بيدخلوا  اصلا 

او حتى فاكرينى 

وكونت امبراطوريتى الصغيره 

اللى  اتبنت بصدق  واخلاص  وحاولت انى
اتحرى الصدق فى  مدونتى 

علشان  دى ما  اقترفته  يمينى 
كل  حرف  منها فيها بدمى 

اتخنقت اكتر 
عملت مدونه الشهاب

علشان  اعيطفيها
كل  ما  الضغوط  تكتر  وتكتر 
اعيط فيها اصرخ  فيها 

وكده يعنى 
وبعد كده نبض روحى 
علشان  حبه حب  على  امنيات  حالم
بحب وحلم وده مش بعيد عن ربنا 
الحمد لله
ـــــــــــــــــــــــ
سبب  الاستمرار  والتوقف

انا بدات تدوين وكان  معايا ناس زى  الفل  ومازالوا

حاسس انى  اتربيت معاهم فى حضنهم
صحيح كل  مدون ليه دائرته الخاصه واللى بيطلع منها دائرته بتوسع بس بيرجع لدائرته الاصليه 
بتاعه زمان  واللى بيسقط معاه من الدائره الكبيره 

ناس  كتيره غابت

وناس  اكتر  غابت 
ومع دوامه الحياه

غبت شهور عن التدوين  وحاولت  ارجع
وبمساعده  اخواتى شهر  النهار 

وغيرهم

بحاول  ارجع تانى 

اصل يا اخوانا فى  احداث
بتمر على الانسان
مش بيلاقى  وصف
ليها
غير  البكا
ومش بيعرف
يعبر
من ثقل
اللى بيحصل 
عنده
ـــــــــــــــــ

امبراطوريتى  الصغيره 
والمشتركين فى  مدونتتى ومتابعين
واللى  حاطين رابط المدونه
واللى بتقع  على  عنيكم بالصدفه ومش بتدخلوا 

مش شرط تدخلوا  او حتى تقرأ 
نظرتكم دى  كفايه 

وانا لا  اديب 
ولا شاعر 
ولا  حتى كاتب
انا عبد الله الفقير
باشخبط وبصدع البنى ادمين
وكتير  بطلت اكتب  علشان  عارف ان محدش
هيقرا
هبلى وعبطى 

بس رجعت وقلت انا  باكتب لنفسى  مش لحد غيرى 

انا بحب  مدونتى جدا

ومش ههجرها  تانى 
باذن الله

الثلاثاء، 13 نوفمبر، 2012

بلاش تهجر مدونتك



كتير  بدخل على  مدونات  الاقيها  مهجوره  من اصحابها

وكتير بدخل  صفحات او جروبات  على الفيس بوك  والاقيها مهجوره برضو

هنا  ايو  هنا  مدونتى  انا  هجرتها  كتير  جدا 

وللاسباب  كتيره 
انشغال او الفيس بوك
وكلنا  عارفين ان  الفيس  سحب  الكل 
اليه
بس ياريت  بلاش  نهجر  مدونتنا

عملت   موضوعين  عن المدونات  المهجوره
بس  اصحابها  انتقلوا  الى  رحمه الله  
واسم  الموضوع اسم الموضوع  اطلال  مدون بعد الوفاه

ليه  نموت  نفسنا بايدينا  

ليه  نموت  نفسنا  واحنا  عايشين  وفينا النفس
  نرتبط بناس  ونهجرهم  حتى  بالدعاء

ومش نعرف عايشين  ولا  انتقلوا  

ليه  نكتب  ونفتح باب 
الفضفضه وبعد كده نقفله 

ليه  نهجر  مدونتنا

اختى  شمس  النهار 
واختى لولا  
نصحونى اكتر  من  مره  بعدم  هجره المدونه 

وفعلا كل مره بحس بحنين

بحس  انى  عاوز  ابعبع  اكتب
انتقد الوضع الحالى  
اللى انا فيه
او  اللى  البلد فيه
اعيط  افرح
مش شرط 
حد يفهمنى المهم

اكتب وبس 

مش شرط ان  حد يفهم 
او حتى يعلق
 فى  مدونين  كثر بيكتبوا  

ومش حد بيعلق  عندهم

وفى  ناس  مش بتعلق  على  تعليق  اللى بيدخلوا  عندهم 

ومش بيدخلوا  عند  حد

ده
مش  تجاهل او  استعلاء

لا  ده دليل انهم عاوزين  يكتبوا  لنفسهم  وبس

ياريت  مش  نهجر مكانا 

وياريت  ندعوا  لمن  مات  منا  من المدونين

ان يجعل  مثواهم الجنه 

وان يلحقنا بهم على  خير  


الأحد، 11 نوفمبر، 2012

الاباحه فى مصر مش جنس وبس على فكره

الاباحيه فىمصر  

فرحنا  وهللنا  فى موضوع غلق  المواقع الاباحيه فى مصر

طبعا  ما  هو كل  الشباب  متجوز  وطبعا الشغل للركب  وطبعا  كل  ساكن فى شقق فخيمه   طبعا  وكمان  ايه
حق  الشهدا جه  واعدمنا مباريك 
وفلوسنا  رجعت 
وسينا  اتحررت للمره  العاشره

وبالطبع  طائر  النهضه  اتجوز  العمليه  نسر

وتمخض  الجبل  فولد  

قرار باغلاق  المحلات فى  العاشره 
مساءا  علشان الناس 
تلحق  تصلى  الفجر 

واصحاب  ورديات  الفجر  من الشباب يعملوا  ايه؟

وقرار بغلق  المواقع  الاباحيه 

كل  القرارت  غلق  غلق  مفيش  فتح  ابدا

متفق  وحيوان  مين يعترض  على  غلق  المواقع الاباحيه بعد ما الناس فى العشوائيات  شغالين  على  المواقع  الاباحيه ليل  نهار  
يا عم  والشباب  مش بيروحوا  الشغل  علشان  سهرانين  على  المواقع  دى 

الله يخليك يا  مرسى  فين  مشروعك ؟ 

فين مشروعك يا  مرسى  واللى قولت  انك  هتوفع  مش  عارف  كام مليار  جنيه خلال 4  سنين  رحت  اقترضت  من الصندوق  الدولى  وكان  الربا  حرام عندكم
لما  مسكتوها  حللتوها ايوه  غلى السولار  وغلى  البنزين  وغلى رغيف  العيش  اللى  اصلا مش  لاقينهم 
بس  المهم  تقفل  المواقع  الاباحيه 
يعنى  تكاليف  مبدئيه 100 ميلون  جنيه  علشان  تغلق  مواقع سكس  مش  كل  الشعب  اصلا بيدخل  على  النت

ومش  كل  الشعب عنده  نت  ولا  حتى  جهاز ولا  حتى  وصله  

نت  تلاقيه  مشترك فيها  
ياعم  الحاج  يا ايها القائمين  على  هذه البلد هناك  اولويات 

شوف  متطلبات  حياتنا 

السولار  مش  موجود والاجره بتاعه المكروباصات 
بقت  الضعف  والعيش  ان  اخر  مره  اكلت العيش  ابو  خمسه صاغ  من 6 سنين 
وكل الاسعار فى  الطالع 
طيب  سيبك من ده
شغلونا يا  حكومه  
اعملوا  مشروعات با100ميلون  جنيه يا  حكومه

بدل  الاستثمارات فى  البروتاهات 
فى الساحل  الشمالى  والشل كل  دقيقه فى الاعلانات 
والناس  مش لاقيين  اوضه يعيشوا فيها 
واكتر  من 3  عائلات فى  اوضه بص فى العشوائيات 

دى مش  اباحيه 
اباحيه  الناس  فعلا مش لاقيه  تاكل  
يا مرسى  عيب  عليك وعيب  على
مكتب  الارشاد بتاعك بجد

بس  المهم  تقفل  المواقع الاباحيه
فى السعوديه مش قفلوها  
اتحد\ى اى  حد هناك
مش  عارف  يدخل  عليها بسهوله 
مش  موضوع اباحيه  موضوع 
اتقاء شر  موجه  ثوره  ثانيه منن  النت 
وده مش  هيحصل  
اللى  جاى  ثوره عشوائيات 
مد\مره 
بس  المهم  المواقع  الاباحيه تتقفل
اعمل  مشروعات اعمل  
مساكل  حق  انتفاع 5سنين للشباب  وشغلهم بال100ميلون  جنيه اللى هتصرفهم على  الحجب 
نضف  العقول  الاول  
قبل  ما  تجبرهم على النضافه 
حسبنا الله ونعم الوكيل\
_________________________

الجمعة، 26 أكتوبر، 2012