السبت، 20 أبريل 2013

خليك ذوق

خليك ذوق 

فيها ايه لما  نروح نشترى  حاجه من السوبر  ماركت او البقال نقول  من فضلك 
مع  ابتسامه  صغننه  وبعد كده شكرا  
او  ندعى للواقف  دعوه حلوة لطيفه 
ونقول  ربنا يبارك فى  عمرك ......


فيها  ايه لما  نركب  ميكروباص  مش  نتخنق  او  نكشر  ان  حد
من ورانا  مد ايده وادانا  الاجره نوصلها للسواق  

ونقوله  اتفضل  
ولما  نطلب  من حد  انه ياخد الفلوس  نقوله من فضلك 
هنخسر  ايه؟
 فيها  ايه لو  كنا هننزل  من الميكروباص  او  الاتوبيس  نقول  لسواق من فضلك  عاوز  انزل هنا  او بعد حبه او  المكان  الفلانى
هنخسر ايه؟.


هنخسر  ايه  لو  الابتسامه على  وشنا  نوزع امل  وتفائل  على اللى  حوالينا  حتى ولو  كنا  مخنوقين فيها ايه؟

فيها ايه  لو  كنا  مدبوحين  وحد سالنا فى التليفون او  على  الواقع احوالك ايه  وبدل  ما نقول  زى  الزفت  نقول  الحمد لله 
ربنا يرضنا بحالنا  ويصلحه لينا

فيها  ايه  اننا  قبل  ما  نزور  حد  نتصل بيه ونستاذنه بالزياره  
ونكون  خفاف  لطاف  نغض  البصر  عن  اهل  بيت  اللى  هنزوره ونوطى صوتنا  وننتقى  الفاظنا  

فيها  ايه  
اننا  نوصل اصحابنا  اللى ليهم  زمن طويل  مش كلمناهم  باتصال  
من غير  عتاب  
من غير شتيمه  ولو  حتى بهزار  

ويا سلام لو  اتفقت انك  تقباله  وقبل  ما  تروح الميعاد  تشوف احوله  هيقدر يجى فى ميعاده ولا  لآ؟
فيها ايه هنخسر  ايه لو  كنا  هنتأخر عن  اى  ميعاد اننا  ننتصل  نعتذر  
ونعطى  الفرصه للى منتظرنا  انه يعتذر  من غير  ما يتربط لينا

فيها ايه يا  اخونا  لو بطلنا  نتعامل بعجرفه مع الناس  حتى الوحشنين
 فيها ايه لو  وصلنا  رحمنا حتى  مع اللى  واثقين انهم بيكرهونا  

فيها  ايه لو  احسنا  الظن بالله قبل  الناس 

فيها ايه هنخسر ايه  
هنخسر  ايه لو  سبحنا  ربنا او  ذكرنا فى  مشاورينا  او صلينا  على  النبى
مش شرط سبحه على  اطراف  الانامل  

فيها ايه لو  اتعودنا اننا  نسمع  القران  بدل  الاغانى 

فيها ايه  لو فعلا  حسبنا  انفسناقبل  ما نروح ننام ونكتب  حتى فى  ورقه صغيره 
هعتذرلفلان وفلان او  اوضح  موقفى لفلان  وفلان
فعلا فى  ناس مش تستاهل

بس  ياعم اعمل المعروف  
وموت بعد كده لعلك مش هتقابله  تانى  
وتسيب  اثر  عنده بسببك يهتدى 

خليك صاحب  ذوق
مش  تعلى صوتك على باباك ولا  مامتك ولا  اهل بيتك
ولا  اصحابك ولا  اخواتك
ولا  اولادك ولا فى  شغلك
  هدى  اعصابك
صدقنى  
مفيش  حاجه تستاهل  العصبيه ولا  قله الادب 


بكره احلى  

هكون ايجابى باذن الله 
وابدا  دفتر  تانى  
من فصل  من فصول  حياتى  
هرسم  جواه  
حياتى زى  ما ان  عايز باذن الله

هناك 5 تعليقات:

ليلى الصباحى.. lolocat يقول...

انت بتحلم يامحمود :)

لو عملنا كل ده مانبقى شعب مصر اللذيذ اللطيف :)

عكس كل اللى قلته الناس بتفتكره شطارة للاسف وابتعدنا ( الا من رحم ربى ) عن القيم والاخلاق وسنة الحبيب عليه السلام


تدوينة زى السكر وعجبتنى اوى اوى
بارك الله فيك ودمت بامان الله
تحياتى بحجم السماء

مروه زهران يقول...


صح جدا يا محمود
عجبنى أوى المقال ده

ندى الربيع يقول...

على فكرة انت صح جداً
مدونتك جميلة لاقيتها بالصدفة النهارده عجبتنى أوى لاقيتك كاتب كتير من اللى عايزة أقوله
طريقتك فى الكتابة بسيطة وسهلة تدخل القلب بسرعه مش بتغلط فى حد بتقول اللى مفروض الناس تعمله عندك حق ؛؛؛
أتمنالك التوفيق دائماً وأتمنى حياتك كلها تكون حب ؛؛؛؛

ندى الربيع يقول...

على فكرة انت صح جداً
مدونتك جميلة لاقيتها بالصدفة النهارده عجبتنى أوى لاقيتك كاتب كتير من اللى عايزة أقوله
طريقتك فى الكتابة بسيطة وسهلة تدخل القلب بسرعه مش بتغلط فى حد بتقول اللى مفروض الناس تعمله عندك حق ؛؛؛
أتمنالك التوفيق دائماً وأتمنى حياتك كلها تكون حب ؛؛؛؛

باحث عن حب يقول...

ربنا يخليكم ويبارك فى قلوبكم نورتوا المدونه المتواضعه

السلام عليكم

 السلام عليكم  يا اهل التدوين معرفش هتفتكروني ولا... بس لاقيت ذكريات وكلام يوجع القلب سنين كتير مدخلتش هنا  وراجعت ذكريات ١٠ سنين ورا لاقيت ...