الثلاثاء، 13 نوفمبر 2012

بلاش تهجر مدونتك



كتير  بدخل على  مدونات  الاقيها  مهجوره  من اصحابها

وكتير بدخل  صفحات او جروبات  على الفيس بوك  والاقيها مهجوره برضو

هنا  ايو  هنا  مدونتى  انا  هجرتها  كتير  جدا 

وللاسباب  كتيره 
انشغال او الفيس بوك
وكلنا  عارفين ان  الفيس  سحب  الكل 
اليه
بس ياريت  بلاش  نهجر  مدونتنا

عملت   موضوعين  عن المدونات  المهجوره
بس  اصحابها  انتقلوا  الى  رحمه الله  
واسم  الموضوع اسم الموضوع  اطلال  مدون بعد الوفاه

ليه  نموت  نفسنا بايدينا  

ليه  نموت  نفسنا  واحنا  عايشين  وفينا النفس
  نرتبط بناس  ونهجرهم  حتى  بالدعاء

ومش نعرف عايشين  ولا  انتقلوا  

ليه  نكتب  ونفتح باب 
الفضفضه وبعد كده نقفله 

ليه  نهجر  مدونتنا

اختى  شمس  النهار 
واختى لولا  
نصحونى اكتر  من  مره  بعدم  هجره المدونه 

وفعلا كل مره بحس بحنين

بحس  انى  عاوز  ابعبع  اكتب
انتقد الوضع الحالى  
اللى انا فيه
او  اللى  البلد فيه
اعيط  افرح
مش شرط 
حد يفهمنى المهم

اكتب وبس 

مش شرط ان  حد يفهم 
او حتى يعلق
 فى  مدونين  كثر بيكتبوا  

ومش حد بيعلق  عندهم

وفى  ناس  مش بتعلق  على  تعليق  اللى بيدخلوا  عندهم 

ومش بيدخلوا  عند  حد

ده
مش  تجاهل او  استعلاء

لا  ده دليل انهم عاوزين  يكتبوا  لنفسهم  وبس

ياريت  مش  نهجر مكانا 

وياريت  ندعوا  لمن  مات  منا  من المدونين

ان يجعل  مثواهم الجنه 

وان يلحقنا بهم على  خير  


هناك 12 تعليقًا:

شمس النهار يقول...

آمين

للأسف كتير من المدونين هجروا مدونتهم
وعملنا اكتر من حمله علشان نرجعهم وواضح اننا فشلنا

قلت طيب اعملوا لها يوم في الاسبوع
مافيش فايده

وفعلا في ناس تروح تعلق عندهم لابيردوا علي تعليقك ولا بيزوروا مدونتك
الحقيقه كنت الاول مش بيهمني المهم اني بطلع علي فكر اخر وبعلق عليه
لكن دلوقتي الحقيقه مش بزور واعلق غير عند اللي بيزروني وبيتفاعل معايا

ماهو مش هفضل اكلم نفسي يعني
اللي بعلق عنده ويرد عليا وبيجي يزورني ويتفاعل معايا بتواصل معاه

بلوجر ده الركن البعيد الهادي
او علي راي عم فؤاد نجم المكنه بتاعتنا

زعلانه بروح مدونتي افضفض لها فرحانه بروح مدونتي افرح معاها

يارب كل الطيور المهاجره ترجع

gogo!sf يقول...

زى دلوقتى كده يا حوده لسه بدخل على بلوجر لقيت اسر بيعيط فقمت بس عند فى رجعت تانى ههههههههههههه


والله يا حوده عندك حق
وانا من فترة كتبت بوست شبه ده بالظبط ولكن مش نشرته
والفيس بوك فعلا اخد وقت الناس والكل استسهله وقرب كتير من بعض وده عمل مشاكل بينهم وده السخيف فيه بجد بقيت احس ان الفيس ده عامل زى الشارع اى حد بيعدى على اى حد من غير استأذان وده مضايقنى جدا منه
بلوجر اجمل واوقر كتير من الفيس بوك

ويارب ارجع زى الاول على بلوجر وياريت كل الناس تهتم بمدوناتها تانى
اتمنى بجد يرجعو بيتهم

موضوع جميل جدا يا حوده
وربنا يرحم امواتنا جميعا ويغفر لهم

حنين محمد يقول...

مساء الغاردينيا أستاذ محمود
للأسف أعترف أن الفيسبوك وتويتر أبعدني عن مدونتي ولكن لازلت أسارع بعد مضي أسبوع أو أكثر بـ العودة رغم أنني أزور المدونات وأصدقائي قدر الإمكان وإن لم أقم بـ النشر في مدونتي ولكن صدقاً لم أحب أي من الفيس وتويتر كـ بلوجر هنا مكانك الخاص وحرفك وأصدقائك وحرية في التعبير والإحساس أكثر وللآمانة هنا أجد المثقفين والواعين أكثر من الفيس وتويتر أتمنى حقاً أن لانهجر مدوناتنا وأن يعود كل من هجر منزل حروفه في بلوجر "
؛؛
؛
جزاك الله خيراً
لروحك عبق الغاردينيا
كانت هنا
reemaas

رحاب صالح يقول...

بحب بلوجر اكتر
بحس فيه خصوصية اكتر
وبحس فيه اني سعيدة ومحدش بيخترق خصوصياتي وبكتب اللي بحسه مش زي الفيس بوك
بالعكس عمر يما هفك اقفل مدونتي ابدا
دي بنتي

لــــ زهــــــراء ــــولا يقول...

ههههه انا لما قرأت اسمي اتخضيت
قولت انا اسمي هنا
عارف مسرحية محمد صبحي لما كان عامل ديكتاتور وبيقول للي بيصوره انا موجود

اهو انا عملت كدا عمالة ابحلق انا ده (: واقرأ السطرين اللي فاتو وارجع لاسمي انا اسمي ده ههههه


ربي يعزك يا محمود ... عندك حق المدونة وعالم التدوين مكانا الاصلي فيه


لولا

نهر الحب يقول...

ربنا يرحم اموت امسلمين جميعا

انا مش بحب اهجر مدونتي بس كتير بيكون غصب عني انشغال ايام ورا بعض ومش ملاحقة اقرا ولا اكتب ولا انشر بس برضه برجع لها في الاخر حتي لو بكتب اي كلام
وبزعل لما مش بزور الناس الي بحب اقرالهم بس بيبقي غصب عني وببرجع برضه اقرا اللي فاتني

باحث عن حب يقول...

يارب يا شمس كل الطيور تعود من تانى
فعلا كلامك واقعى وانا مريت بالمرحله دى هجر المدونه صعب زى كده هجر القلوب والبيوت

باحث عن حب يقول...

جوجو

يارب يخلى اسرليكى يارب ويبارك لكم فيهم يارب....
فعلا كلنا بنعانى من مشكله الفيس الفيس ده سرقنا من بيوتنا ان شاء الله نرجع نفضفض وونعيط كمان

باحث عن حب يقول...

ريماس
الله اكبر لا قوة الا بالله انتى حوروفك لوحدها يا ريماس بتحسس اى حد انكلو حتى غيبتى مش غايبه حروفك والله بتجدد نفسها بنفسها الله اكبر
وعندك حق لازم نقعد فى بيتنا ونكتب ونفضفض ولو مره فى الشهر حتى منورانى

باحث عن حب يقول...

يارب يخليك بنتك يا رحاب يار ب
فعلا خصوصيه اكتر بكتييييييييييير

باحث عن حب يقول...

لولا
عندك حق مكانا الاصلى فعلا
ههههه
يارب يسعدايامك يارب ويدخل الفرحه فى قلبك دايما

باحث عن حب يقول...

نهر الحب
فعلا دوامه الحياه كبير ه
جدا
انا للاسف اخدت فتره طويله مش حتتى اعلق على الناس اللى بتدخل عندى وبطلت انشر وكده
بس حنيت تانى للمدونه ملناش بيت غيره

السلام عليكم

 السلام عليكم  يا اهل التدوين معرفش هتفتكروني ولا... بس لاقيت ذكريات وكلام يوجع القلب سنين كتير مدخلتش هنا  وراجعت ذكريات ١٠ سنين ورا لاقيت ...