الثلاثاء، 20 نوفمبر 2012

امبراطوريتى الصغيره


السلام عليكم 

تدوينه  الاسبوع 

فى  حمله التدوين الاسبوعى 

وعلى فكره  اللى يدخل  هنا  مش شرط  يسيب  تعليق اللى يعلق  اهلا  وسهلا
واللى مش يعلق  برضوا  اهلا  وسهلا 
ـــــــــــــــــــــــ
امبراطوريتى  الصغيره

زمان بقه زمان  خالص  مالص
يعنى يجى من 3سنين كده اقل  حبه اكتر  حبه مش فاكر 
عملت  مدونه باحث  عن حب  
هتكلم  فى الموضوع ده 
سر  الاسم؟
سبب  التدوين؟
وسر  الاستمرار  والتوقف؟
واى  حاجه هتجى على بالى  بعد حبه كده

سر  الاسم.............

ايام المنتديات بقه 
كنت مجنون  بمنتدى  اسمه  منتدى  مجانين

وكنت  من العاشقين له  وكان  تابع لموقع  مجانين 

وهو  موقع صحى  نفسى  اسلامى  وكان  موقع  ممتااز وما زال كنت عضو فى  المنتدى باسم باحث  عن حب 

وعشقت الاسم  وهو  البحث عن  حب  حب  كل حاجه فيها  خير  وتقديمها للناس  صحيح  كنت بتفهم  كتير غلط لانى مش بدور  عن الحب  وبس بل الحب  بكل معانيه الحسنه 
وبعد كده  كان فى  عضوه اسمها بوتا 
العضو دى  كانت عامله مدونه 
الحنين للذكريات  
وكنت  مجنون بكتاباتها  وقلت لازم اعمل مدونه  زيها

وعملت  مدونه قعلا بس  معرفش اتفاعل 
خالص 
وبعد كده عملت المدونه 
اللى بشكلها  الحالى
ـــــــــــــــــــــــــــ
سبب  التدوين 

التدوين له اسباب  كتيره  جدا جدا جدا

منها خالص  ومنها  عام ومنها سرى  
والمدونه حاجه شخصيه  جدا بس  بتكون مشاع 

بمعنى  كل  واحد بيسقط اسقاطاته على صاحب المدونه زى ما  هو شايفه  او فهمه  وده من وجهه نظرى  غلط

المهم 
السبب  العام  فضفضه 
اكتر من المنتديات اللى  تم هجرها 
برضوا والناس طفشت  منها 
من  المدراء  اللى بتحكموا
بالناس وكده
وكنت  كاتب  كام خاطره  كده

فى  كذا  منتدى  قلت  لازم  اسجل  بقه حركاتى سكاناتى  دموعى  ضغوطى  النفسيه اللى  بمر  بيها 

وطبعا  خلال  الثلاث  سنوات  اللى فاتت  مررت باسوء مرحله فى حياتى  مش عارف  اوصفها بس  انا لسه مش  خرجت من دوامتها حتى  الان 

متنفس باتنفس  منه  على  البشر اللى حواليا

واتعرفت على بنى ادمين حلوين 
وهحكى  عنهم  او بعض  منهم

عارف  ان بعضهم  هيزعل  منى 

بس  لو كانوا  بيدخلوا  اصلا 

او حتى فاكرينى 

وكونت امبراطوريتى الصغيره 

اللى  اتبنت بصدق  واخلاص  وحاولت انى
اتحرى الصدق فى  مدونتى 

علشان  دى ما  اقترفته  يمينى 
كل  حرف  منها فيها بدمى 

اتخنقت اكتر 
عملت مدونه الشهاب

علشان  اعيطفيها
كل  ما  الضغوط  تكتر  وتكتر 
اعيط فيها اصرخ  فيها 

وكده يعنى 
وبعد كده نبض روحى 
علشان  حبه حب  على  امنيات  حالم
بحب وحلم وده مش بعيد عن ربنا 
الحمد لله
ـــــــــــــــــــــــ
سبب  الاستمرار  والتوقف

انا بدات تدوين وكان  معايا ناس زى  الفل  ومازالوا

حاسس انى  اتربيت معاهم فى حضنهم
صحيح كل  مدون ليه دائرته الخاصه واللى بيطلع منها دائرته بتوسع بس بيرجع لدائرته الاصليه 
بتاعه زمان  واللى بيسقط معاه من الدائره الكبيره 

ناس  كتيره غابت

وناس  اكتر  غابت 
ومع دوامه الحياه

غبت شهور عن التدوين  وحاولت  ارجع
وبمساعده  اخواتى شهر  النهار 

وغيرهم

بحاول  ارجع تانى 

اصل يا اخوانا فى  احداث
بتمر على الانسان
مش بيلاقى  وصف
ليها
غير  البكا
ومش بيعرف
يعبر
من ثقل
اللى بيحصل 
عنده
ـــــــــــــــــ

امبراطوريتى  الصغيره 
والمشتركين فى  مدونتتى ومتابعين
واللى  حاطين رابط المدونه
واللى بتقع  على  عنيكم بالصدفه ومش بتدخلوا 

مش شرط تدخلوا  او حتى تقرأ 
نظرتكم دى  كفايه 

وانا لا  اديب 
ولا شاعر 
ولا  حتى كاتب
انا عبد الله الفقير
باشخبط وبصدع البنى ادمين
وكتير  بطلت اكتب  علشان  عارف ان محدش
هيقرا
هبلى وعبطى 

بس رجعت وقلت انا  باكتب لنفسى  مش لحد غيرى 

انا بحب  مدونتى جدا

ومش ههجرها  تانى 
باذن الله

هناك 15 تعليقًا:

ياسمين يقول...

صح المدونة دي عالم كدا لوحدك من صنعك ,تصرخ وتضحك وتفعل ماشاء ومحدش هيقولك حاجة,حتي لو حد قال حاجة ,فيه حظر^_^
بس عجبتني آخر جملة نكتب لأنفسنا..!معبرة أكثرر

مروه زهران يقول...


جميلة أوى فضفضتك
ودى أحلى حاجة فى نعمة الكتابة وكمان فى المدونة
اننا بنقدر نعبر عن كل حاجة جوانا
وزى ما قال الرائع عبد الوهاب مطاوع
العصافير الخرساء التى لا تعرف الغناء بتضاعف من معاناتها
ربنا يوفقك :)

حنين محمد يقول...

مساء الغاردينيا محمود
وألف ألف مبرووك سنوات حب في مدونتك بجد مدوناتنا جزء منا بتحسها بيتك الصغنن الي بتعيش فيه مع إحساسك وجنونك ولحظاتك الي بتسجلها وترتبط بجيران حواليك يبقوا هما أهلك وسندك في رحلة الحرف في بلوجر بجد انا من الناس الي بتتعلق بلي حواليها وبتمنى بجد أشوفهم حواليا وبدايق اوي من نفسي لما مش بقدر ازورهم او بتأخر عن مدوناتهم بس بفضل مكسوفه ومدايقه لحد ماأسيب كومنت وأشاركه مشاعره .. بحيي فيك مشاعرك وإحساسك الجميل بالتدوين "
؛؛
؛
لروحك عبق الغاردينيا
كانت هنا
Reemaas

ليلى الصباحى.. lolocat يقول...

المدونة مملكتك وامبراطوريتك الخاصة وقصرك الجميل
اكتب ...شخبط..خبط...لخبط
انت حر مالم تضر :)

انت انسان حساس وجميل استمر بالكتابة ومايهمك مين يعلق ومين لأ
تعرف النهاردة كنت بفكر انى كتير من الاصدقاء مابقوش يتركوا تعليق بمدونتى ولابيزورونى لقيت نفسى بترد على بتقول انت بتكتبى فى مدونة اسلامية يعنى بتعملى حاجة المفروض لوجه الله يبقى ماتنتظرى كلام حد خالص واكيد فيه انسان هيقرأ كلامك ويستفيد ويدعيلك بظهر الغيب وده كفاية عندى

الاجمل انك تكتب لنفسك المدونة بالنسبة لى كانت ( طبيب نفسى) فرغت فيها شحنة اكتئاب على شوية يأس على شويتين حزن :)
التدوين وعالم التدوين عالم رائع وجميل وقابلنا ناس كتير سكر على شربات على بنبونى :) انت منهم يامحمود انسان حساس وطيب القلب ويشرفنى دايما انى اتابعك اخى الكريم

تحياتى لك بحجم السماء

بسمة الورد عطر المشاعر يقول...

عليه افضل صلاه واتم تسليم

مساء الهنا عليك ياباحث عن الحب

راقت لى مدونتك جدا واسلوبك الساخر اللذيذ .. ويسعدنى ان اكون من المتبعين ان شاء الله

مودتى

شمس النهار يقول...

اهلا بيك تاني في بلوجر يامحمود
المدونة دي هي الكتف اللي بنبكي عليه
وانا فخوره اني هنا وسطكم
وبتعلم منكم كمان

رحاب صالح يقول...

هي شموسة قالت المفيد
مدونتي بالنسبة لي الكتف اللي ببكي عليه لاني مش بحب ابكي ادام حد ولا علي كتف حد
مدونتي بنتي واختي وصاحبتي ودنيتي
وهي حياتي فعلا حتي لو مش حرة فيها
تحياتي يا محود وياريت متهجرش مدونتك تاني

باحث عن حب يقول...

ياسمين
منورانى
يارب يبارك فيكى
فعلا
انا باكتب لنفسى مش لحد
انا مش اديب ولا صحفى ولا ولا ولا انا بفضفضومش بالضرورى يعجب اى حد الكلام بس لازم احترم اى حد يمر على المدونه او حتى يدخل يقرا او يعلق انى مش اجرحه ولا حتى بصورة ولا حتى لفظ منورانى

باحث عن حب يقول...

الاديبه مروه زهران
العصافير الخرساء التى لا تعرف الغناء بتضاعف من معاناتها

رائعه المقطوعه دى فعلا
رائعه
لازم نكتب نفضفض حتى ولو محدش سمعنا
المهم نطلع اللى جوانا
مشرفانى اختى

باحث عن حب يقول...

ريماس ملكه الاحاسيس والمشاعر
رحلة الحرف في بلوجر
تعبير جميل جدا
طبعا هى رحله بنشيل فيها كل هموم وضحك وافراح واحزان وكله فى البيت ده فى مدونتنا والجيران الحلوين اخواتنا اللى بنروح ونجى معاهم بيحسوسونا اننا موجودين او على الاقل فى حد فاهمك ولو حتى مش شايفه
منورانى ريماس

باحث عن حب يقول...

الفردوس الاعلى
ام هريره
ليلى الصباحى
اختنا الكريمه ومدونه قطتى والمدينه الفاضله وسلما للسما
كله ده تفريغ شحنه
زيى انا باحث عن حب والشهاب ونبض روحى وجديد عابر سبيل كله تفريغ طاقه شحنه
طبيب نفسى بنعالج نفسنا بنفسنا احسن من ان الانسان يعمل حاجه غلط او حاجه حرام الاجمل انك تكتب لنفسك المدونة بالنسبة لى كانت ( طبيب نفسى) فرغت فيها شحنة اكتئاب على شوية يأس على شويتين حزن :)

صدقتى فى كلامك اختنا
انتى لوحدك بتاخدى ثواب عظيم جدا وبيكونعليكى مسؤليه انك تكتبى الحاجه صح وتبحثى على صحتها وتكون موثقه وعلشان كده الاجر بيكون عظيم يارب يجعله فى ميزان حسناتك يارب منورانى اختى

باحث عن حب يقول...

بسمه الورد
منوره المدونه المتواضعه بتاعتى
ويارب يسعدك ويفرح قلبك يارب
يشرفنى اختى

باحث عن حب يقول...

شمس النهار
اختنا الكبيره وحبيبتنا
المدونة دي هي الكتف اللي بنبكي عليه

صح
قوى قوى قوى

احنا اللى بنتعلم من حضرتك ومن خبرتك ومن حنيتك علينا
يارب يخليكى لينا ويحفظك يارب

باحث عن حب يقول...

شمس النهار
اختنا الكبيره وحبيبتنا
المدونة دي هي الكتف اللي بنبكي عليه

صح
قوى قوى قوى

احنا اللى بنتعلم من حضرتك ومن خبرتك ومن حنيتك علينا
يارب يخليكى لينا ويحفظك يارب

باحث عن حب يقول...

اختى رحاب
فعلا
كلامك

وكلام شمس
مش ههجرها
وقاعد على قلب بلوجر
وعلى قلبكم
يارب يجمعنا دايما على خير يارب

السلام عليكم

 السلام عليكم  يا اهل التدوين معرفش هتفتكروني ولا... بس لاقيت ذكريات وكلام يوجع القلب سنين كتير مدخلتش هنا  وراجعت ذكريات ١٠ سنين ورا لاقيت ...