الثلاثاء، 30 نوفمبر 2010

اعترافات ليليه+تحديث الشهاب

السلام عليكم 
مدونه الشهاب وبوست اخير فيها
تعالو بصوا فيه بصه
لاتقرأ الموضوع الموضوع فيه احباط قاتل


السلام عليكم
اناهدخل فى الموووضوع على
طول
اعترافات ليليه مهداه من
مرمر

1_اعترف انى اسمى محمود محمد وباقى الاسم لسه بدور عليه 
2_اعترف انى طيب وساذج وممكن اكون عبيط او اهبل عادى يعنى
3_اعترف انى لما احب بحب قوى ولما بكره  بكره  وى قوى قوى
4_اعترف انى بادرك الامور بعدين  ومش فى وقتها بس قبل فوات الاوان
5-اعترف انى بتأثر باى دموع  قدامى بتنزل ومش بستحمل اشوف حد  بيتألم
6_اعترف انى وحيد  ورغم ان هناك  من  يعتبرنى صديقه الوحيد بس صديقى الوحيد  بعيد عنى
7_اعترف انى لم اجد نفسى حتى هذه  اللحظه
8_لما بضحك بضحك من جوه قلبى وضحكتى مميزه وعاليه واللى يسمعها يقول ده معندهوش هموم
9_اعترف انى بحب ابكى واعيط بس محدش يقدر يشوف دموعى ابدا لان محدش شافها الا اتنين وهما اخوياواعز اصدقائى وبس
10_اعترف انى محتاج حضن كبير ابكى فيه واشعر فيه بالامان
11_اعترف ان الامل مات عندى من زمان خالص وبالرغم انى بدور عليه  بس لاقيته  هذه الايام
12_اعترف انى  خايف من  بكره رغم  يقينى انه افضل
13_اعترف انى كسول بحب اهرب ومحبش اواجه المشاكل
14_اعترف انى بحب الهدوء  والراحه وبدور على هدوان السر
15_اعترف انى بحب اشوف الكارتون خالص وبحب احمد حلمى قوى قوى وبحب هنيدي
16_اعترف انى بحب الانشاد الدينى خالص وبحب الصوفيه المعتدله وبحب ال البيت وبحب اقرأ فى الرقائق
17_اعترف انى بحب حضره النبى قوى قوى قوى بس مش قادر امشى على سنته
18_اعترف ان صديقى المملوك اكرمه اللهبالحج واتصل بى من امام حضره النبى صلى الله عليه وسلم وقال لى سلم على رسول الله  صلى الله عليه  وسلم  اتكسفت  قوى وقلت  لنفسى مكسوف من حضره النبى اتكسف على دمك  منرب العالمين
19_اعترف انى نفسى اكون  محمود زى ما نفسى اكون بجد ومش عاجبنى محمود خالص
20_اعترف اننى مصدر الم  فى عائلتى بسبب تعثرى والم فى نفس ماماوبابا وشايف نظره خيبه الامل فى عيونهم  رغم  انهم  ياخذون بيدى الى الامام رغم بساطتهم الشديده ونفسى افرحهم  بيا
21_اعترف ان العزيمه ماتت والااده سافرت والقوةى وهنت وخايف عليا من  بكره قوى
22_فرحت كتير باخواتى وفرحت اكتر باحبابى بس لغايه تلوقتى مفرحتش بيا
23_اعترف انى محبش الوش العكر ولا البوز الممدود
فى اعترافات كتيره ممله وصعبه
ونكد بس انا مش عاوز اكتب اكتر من كده
بس انا تلوقتى فى حاله حلوة رغم الحزن اللى جوايا  والهموم اللى عليا انا فاهم الحب فى الله وبحاول اطبقه بس محدش فاهمنى ومش لاقى فعلا حد  يشلينى  ولا يشيل همومى ولا يساعدنى
علشان محدش عارف يساعدنى
اخيرا
اقول
الحمد لله


هناك 29 تعليقًا:

Unknown يقول...

اعترافات قويه جداً و صريحه جداً جداً
بس ليه معاندكش أمل انت لسه في بداية حياتك يعني معاندكش غير الأمل و مفيش أي حاجه في الدنيا تخلي الانسان يعيش من غير أمل
القوه و العزيمه اللي انت فاكرهم ماتوا هيطلعوا أكيد وقت ما تحتاجهم بس ماتخليش كلامك سلبي عشان كده هتتأثربيه أكتر
واضح انك انسان حساس و عندك ايمان خليك أقوى من كده الحياه مش عايزه ضعف مش عارفه ليه بنصحك زي ما أكون أختك الكبيره أكيد اتخنقت مني
ربنا يرزقك بالأمان و الحضن اللي يحتويك و يبدد وحدتك:)

غير معرف يقول...

عليه افضل الصلاة والسلام
ليه اعترافاتك حزينه كدا يا محمود
الدنيا لسا ادامك
لسا ادامك طريق النجاح
وان شاء الله بابا وماما هيفتخروا بيك

انت انسان طيب
وقلبك ابيض

وايه يعنى تبكى
كلنا بنحتاج اننا نبكى
ونفضفض
ابكى لما تحس انك عايز تبكى
دا مش ضعف
بالعكس

ربنا هيوفقك
ان شاء الله

تحياتى لشخصك الطيب

sony2000 يقول...

صدقني
هتلاقي
كنت يوم ذيك كدا
ومن اللي شفتوا
اتعلمت كتير اوي
ولسه ياما الواحد هيتعلم:)

ليلى الصباحى.. lolocat يقول...

السلام عليكم ورحمة الله
اييييييييييه ده اخى انا امام شخصية رومانسية جدا جدا فى زمن لا يعترف بالرومانسية
اعترافات فيها الجميل وفيها غيرذلك
لازم يكون عندك امل وحسن ظن بالله واى ابتلاء يمر عليك لازم تخليه يسيبك وانت اقوى زى الحديد كل ما تطرقه يزداد صلابة

واضح انك شايف نفسك بعيوبها بس ده لازم يجعلك تصمم على التطوير والاصلاح لحد ماتوصل للكمال البشرى بقدر المستطاع
ارضى ربك هترضى انت وماتسيبش الايام تلعب بيك ابدا

جميلة شخصيتك بكل عيوبها لانك واضح وصريح فى زمن اغلب الناس بتزين نفسها بالباطل
كانى اول مرة اعرف الباحث عن الحب (والامان )

جزاك الله خيرا اخى الكريم انك شاركتنا افكارك واعترافاتك

تحياتى لك وتقديرى

ツSmiLeY AnGeLツ يقول...

السلام عليكم
والله ماني عارفة اقول ايه
والله حساك شخصية طيبة وحنينه
بس لاتظلم نفسك بكلامك اكيد في شي انت مبسوط بيه واكيد ممتك وباباك فرحانين فيك ومفيش اي نظرة خبية فيهم لك
مفيش والدين يشوفوا ابنهم كده اكيد بيحبوك وشايفنك قدوتهم وناجح بحياتك
واكيد في يوم هيجي شخص وهيشيل معك همومك وهيريحك
ماضاقت الا فرجت
ربنا يوفقك ويحفظك ويبعد عنك همومك
تقبل مروري
سلامي ليك اخي.

جايدا العزيزي يقول...

ههههههههههه

بلاش انا تكرهنى والنبى يامحمود

انا زيك طيبه وعبيطه

لا بس ما شالله عليك

اجابات رائعه

لشاب ربنا يحرسه من العين

تحياتى

شمس النهار يقول...

اعترف اني اتأثرت جدا بعترافاتك
واعترف اني لم اندهش
من فقدانك للأمل
علشان ده حال الجيل بحاله

يمكن من كتر الكبار ماقالوا زمان وخير زمان انتوا اتعقدتوا

ونستوا ان الامل في الله وحده

اللي طمني انك معترف بالحمل اللي علي والديك وانك نفسك تفرحهم

طيب مادام انت معترف ماتعمل اللي يفرحهم مستني ايه

ربنا يوفقك لما فيه الخير
ويريح قلبك

ليس فقيرا من يحب يقول...

ازيك يا محمود وازى اخبارك
الحمد لله انك بخير

حلوة قوى الاعترافات دى وفيها شويه تناقض مخلينها حلوة وان كانت مغلفه بالحزن وشويه شجن على احباط
المحصله بتاعت الاعترافات دى انسان طيب

يارب يسعد ايامك

افروديت يقول...

ربنايبعدعنك الهم والحزن يامحمود ويهديناأجمعين ونمشي ع سنة رسول الله

صلي الله عليه وسلم

اعترافاتك حقيقية مش بتتجمل يامحمود دي ميزة جميله

تحياتي ليك

mrmr يقول...

شكرا لاستجابتك للدعوه
واحب اقولك انك شخص طيب قوى وحنين
وربنا ح يكرمك باذن الله
بس انت ارمى الحزن من وراء ظهرك وخلى الامل قدام عينيك
ربنا يفرح قلبك
تصبح على خير

BNT ELISLAM يقول...

اجمل حاجه فى اعترفاتك انك جاوبت على نفسك واول النجاح انك تقتنع انك فشلت وانك اخطأت ومستنين اعتراف النجاح

Noha Saleh يقول...

بجد اعترافاتك جميلة اوى
رغم انها مؤثرة اوى وفيها حاجات صعبة
بس فعلا تدل على انك شخص طيب جدا
ربنا يوفقك دايما

كلمات من نور يقول...

الاعتراف بالخطا نصف الطريق للنجاح يا محمود يا باحث عن الحب

انت محتاج شوية دعم وشوية شد ودن لنفسك ولو مش عارف تعالى أنا أشد ودنك و ادعمك (:

الحمدلله محدفتش الاعترافات دي علينا

اوعى الا مش حجاوب ابدا

ساسو يقول...

بجد انت انسان طيب جدا
وهادي لابعد الحدود
واحساسك جميل
واعترافاتك رقيقه بجد
بس ليه الحزن
عيش الحياه بحلوها ومرها
واكيد هتلقا كل الخير
لان الانسان الطيب
صاحب المشاعر الرقيقه
كل حاجه حلو هتبقاله
بس انت حاول تخرج نفسك من مود الحزن دا
وربنا يخليلك اهلك
والله اكيد فخورين بيك
وانت اكيد عندهم كل الدنيا
مش عيب اننا نبكي البكا بيريح جدا

خليك واثق دايما في ربنا
وواثق انك احسن انسان في الكون
وصدقني كل الخير مكتوبلك
وهتعيش اجمل حياه
بس انت بارادتك تتغلب علي حزنك
وتطرده من حياتك للأبد

أنا وحماتي يقول...

علي فكرة يا محمود احنا كتير مننا مش بيكونوا راضين عن نفسهم وبيحاولوا دايما التغيير للاحسن وهو ده المهم
بتمني انك تكون احسن دايما

عاشقة الجنة يقول...

السلام عليكم:
محمود:
بجد اعترافات جميلة قوى
وحلو انك تعترف ان فى عيوب فى شخصيتك
وتحاول بقدر الإمكان تعدّل فيها وبمشيئة الله تكون فى أحسن حال.

خالص تقديرى واحترامى

تحياتى

sweet angel يقول...

ربنا يرضى عنك ويزكي نفسك ويرزقك الحب الذي تبحث عنه والسعادة التي تستحقها يا استاذ محمود

رحاب صالح يقول...

انا يا محمود لو اعترفت هقول اني بقيت احسن من الاول كتير وبقيت فاهمة اكتر وبقيت اسمع اكتر مما اتكلم
بس كان نفسي بجد اني اتعلكم ازاي مبقاش طيبة بالشكل ده
عموما يا محمود انت اكيد هتعرف ازاي تبقي احسن وكويس انك عارف وفاهم ومقدر اهلك كويس وده مهم جدا ف حياتنا
وبعدين الحمد لله علي كل شيء

miroooo يقول...

اعترافات جامده جدااااااا
احسن حاجه فيك انك صريح فى ناس كتير بتحاول انها تخفى الحقيقه حتى عن نفسها
وبالنسبه لتقصيرك فى حق ربنا الاحساس ده عندنا كلنا ومهما هنعمل مش هنقدر نوفى حقه علينا بس ادينا بنحاول وربنا معانا ان شاء الله
تمنياتى لك بالسعاده

2alam_Rosas يقول...

امممممممممممممممممممم
اعترافات خطيرة من شاب رومنسي ويبحث عن حب
فيه جزء كبير من اعترافاتك كنت متوقعاه فى شخصيتك
وفيه جزء تانى غريب شوية
الاهم انك شايف نفسك بميزاتها وعيوبها وبكدة تبقي تبقي حطيت رجلك على أول سلم التغيير للأفضل

لــــ زهــــــراء ــــولا يقول...

محمووووووووووود

فى البدايه لابد ان اقدم لك احترامى وتقديرى على هذه الاعترافات بس عاوزه اقولك على حاجه اقصد شوية حاجات
ولعى فكره لو تحب التعليق يكون غير قابل للنشر مافيش مشاكل لانى باتكلم مع اخ فى الله
بص يا سيدى الشمس تطلع كل يوم جايبه معها امل فى يوم جديد جايبه معها احلام ممكن نحقق منها واحد على الاقل ..
بكره ده لسه حكايه بعيده لسه فى علم الغيب يبقى عيش اللحظه كويس اوى خطط لمستقبلك خطط قريبه وخطط بعيده
يعنى قول انا عاوز اعمل كذا فى شهر ديسمبر وكذا فى سنة 2011 واكتب الكلام ده فى ورقه واختفظ بها عندى وكل اسبوع حاول تشوف انت حققت حاجه او وصلت لحاجه ولما توصل لتحقيق اى حلم حتى لو كان بسيط لازم انك تقدم مكافاه لمحمود لانه عمل حاجه كان نفسه فيها
حاول تشوف صديق مخلص تتشاركوا مع بعض فى كل حاجه فرح وحزن صديق يكون لك معين وانت تكون له سند

ادعو الله ان يهبك سعاده وخير والحب الذى تحبث عنه

زهراء

محطات ثقافية يقول...

السلام عليكم
اعترافات بسيطة وعميقة في نفس الوقت
عكست شخصية طيبة جدا
بارك الله فيك

شوية قهوة يقول...

اولا الحمد لله على كل حال
اجمبل شيء انك تهزم الحزن بالفرح
ولازم يفضل الامل عايش جوانا لانو لو مات احنا كمان هنموت
تحياتي

فكرة من الزمن ده يقول...

اعترف ان اعترافات حضرتك
اكدتلي اعجابي بنفسي لان نظرتي في الشخص اللي امامي بتكون صحيحة وهي ان محمود انسان طيب ونقي من الداخل وابيض
تحياتي

فكرة من الزمن ده يقول...

((هدوان السر))
عجبتني

عباس ابن فرناس يقول...

ومين سمعك يامحمود

يظر ان مشاكلك هى مشاكل جيل بحاله
حاسس انه مش لاقى نفسه وضايع
ومستنى حد يفهمه بس مش لاقى
يحلم باليل
يصحى الصبح يلاقى حلمه ميت

تحياتى

Wise يقول...

اعترافات قوية
وجميل انك لامس عيوبك ومعترف بها مش متجاهل تواجدها وده اول خطوات التخلص منها
بس واضح ان الحزن بقى صفة مميزة للجيل ده
اسال الله لك التوفيق

غير معرف يقول...

صىلى الله عليه و سلم
كلماتك اثرت فيا كتير و شوية و كنت حعمل فزيحة بالعياط بس لميت نفسي

انا صعبان عليا الشباب العربي كلنا عايزين حضن نعيط فيه من قلة حنان و لا القدوة لا من الغلب اللي عايشينو كلنا بنقول نفس الكلمة بس انا حاسة ان احنا عايزين حضن النبي يحضن الامة و يوجهنا للصواب و نتحامى بيه
يارب بس مايبعدناش يوم القيامة و يقلنا بعدا بعدا سحقا سحقا
رغم اني مش عارفه مش حيقلهالنا ليه و لا على ايه شنت و مضيعينها قران و هجرناه اسلام و سايبينو الغرب بيخبص فيه براحتو

ربنا يهدينا و يعفو عنا


اخي ابقى زورنا

في مدونتنا

http://1000khybawkhyba.blogspot.com/

غير معرف يقول...

لم. هذا بلوق هو مدهش. كيف يمكن جعلها تبدو وهذا جيد؟

السلام عليكم

 السلام عليكم  يا اهل التدوين معرفش هتفتكروني ولا... بس لاقيت ذكريات وكلام يوجع القلب سنين كتير مدخلتش هنا  وراجعت ذكريات ١٠ سنين ورا لاقيت ...