الجمعة، 11 يونيو 2010

حسبنا الله ونعم الوكيل (ربنا يصبرك يا ام خالد)

كان شاب طيب ومحبوب من كل الناس عمرى ما شفت حد زعلان منه روحه حلوه مالى علينا البيت ضحك وحب .. حب لاخواته واحترام ليا ولابوه .. ابنى كان جدع قوى مع اصحابه .. ابنى كان شاب مكافح بيشتغل وعنده مكتب استيراد وتصدير عمله مع اصحابه وبيكسب رزقه بعرقه .. عمره ما ضايقنى انا ولا ابوه ولا حملنا فوق طاقتنا .. اعتمد على نفسه وبنى نفسه بنفسه .. ابنى كان قاعد فى حضنى امبارح بيضحك ويحلم ببنت الجيران اللى بيحبها ونفسه يخطبها وبيحكى لى على اولاده اللى هيديهم لى اربيهم زى ما ربيته هو واخواته .. ابنى كان بيتفرج معايا على التليفزيون وسهران معايا انا وابوه واخواته ونايم فى حجرى .. ابنى كان بيقولى انه مهما كبر بيحب قوى يحس انه لسه طفل بين ايديا وانه بينسى تعب الدنيا والجرى ورا لقمه العيش لما اخده فى حضنى .. ابنى كان بيسمع شكوة اخته امبارح وبيطبطب عليها وكان بيوعد اخوه الصغير بهديه حلوه لما ينجح .. ابنى ده كان نور عينى اللى ربنا كرمنى بيه وقلت ان الايام عوضت صبرى خير .. ابنى كانت اى ام بتتمنى اولادها يبقوا زيه فى اخلاقه وحب الناس له .. نزل خالد من البيت وسلم على ابوه وباس ايدى وطلب منى انى ادعى له نزل بعد يوم مرهق فى شغله يغير جو ويسهر مع اصحابه شويه ... دخل سيبر يفرج عن نفسه ماهو تعبان ياحبيبى طول اليوم ..وضحك وهزر مع اصحابه من قلبه .. ودخل عليهم البوليس يفتشهم .. والله ابنى كان محترم ومش بتاع مشاكل .. بس كان متربى على عزه النفس وان كرامته فوق كل شئ ومش بيقبل بالاهانه ابدا .. ابنى ماعملش حاجه والله ..هو بس سئل رجال الشرطه احنا بنتفتش ليه؟؟؟!!! وكان مصيره الضرب حتى الموت .. اه مات ابنى .. مات ابن عمرى .. مات حته من قلبى .. مكنتش اعرف ياابنى انى مش هاشوفك تانى ... ااااااااااه ياخالد لو كنت شفتهم ياابنى كنت نهشتهم باسنانى ولا انهم يمسوك بسوء ياحبيبى ... سامحنى ياابنى لانى ربيتك على الاخلاق .. سامحنى ياابنى لانى طلعتك محترم فى بلد مش بيعيش فيها الا البلطجيه ... حسبى الله ونعم الوكيل .. حسبى الله ونعم الوكيل ... تارك عند اللى خلقك يابنى مفيش فى ايدى شئ الا دموعى ياحبيبى .. سامحنى ياخالد .. سامحنى ياابنى






ياترى كام خالد فيكى يابلد؟؟؟؟؟؟؟؟؟؟؟؟؟؟؟


المصدر الرئيسى للخبر

حلم لسه مستسلمش




السلام عليكم
ياريت كلنا مدونين ومدونات ننشر المووضوع ده باى اسلوب مع الصوره دى
علشان
نقفد ولو باقل امكانيتنا
قدام اللى
بيحصل
لينا
من امتهنا
كل يوم
وحسبنا الله ونعم الوكيل
وكلنا خالد





هناك 10 تعليقات:

Ramy يقول...

اولا الله يرحمة ويسكنة فسيح جناته

طبعا الموضوع صعب انا كتبت كتير فى مدونات تانى وعلى الفيس بوك

فأعذرنى لو مش هكتب تانى

انا اسف قلبى وجعنى جدا

بس ان شاء الله هكون من متابعى مدونتك

عجبتنى وربنا يوفقك

وربنا يبعد عن المشاكل وتتحل المشكلة اللى انت فيها

mrmr يقول...

محمووووود
الله يسامحك انا قلبى وجعنى وانت كملت عليا
ربنا يصبر ام خالد ويعطيها الصبر والسلوان
وربنا موجود هو المنتقم الجبار
خالد ليس الشخص الوحيد اللى فى البلد اتظلم يوجد مئات بل الوف من خالد
نتمنى من كل قلوبنااحترم اداميه الناس
ربنا يوفقك فى الامتحانات ويكون معاك

غير معرف يقول...

السلام عليكم ورحمة الله وبركاته

ربنا يصبرك ياام خالد يارب

ويعطيكى الصبر والسلوان

تحياتى

ساسو يقول...

بجد سامحني مش عارفه اكتب اي حاجه
قلبي بيتقطع علشانه

♥♥ شذا ♥ الروح ♥♥ يقول...

حسبى الله ونعمه الوكيل
الكلام وجعنى اوووى
بجد حرررررام حرام
وظلم امال لو مش كنا مسلمين زى بعض كان ايه حصل

ارحمنا يارب احنا فى زمن الوحوش واللى هيطول التانى هيموته

ارحمنا يارب برحمتك
وانا لله وانا اليه راجعوان
وحسبى الله ونعمه الوكيا

داليـ ـ ـ ـ ـ ـ ــــا يقول...

كفايه بقه بجد انا قلبى وجعنى وكفايه دموع بقه بجد
انا عارفه ان الحكايه صعبه اووووووووووى
وارواح الدنيا كلها ما تكفى طاره

ربنا يصبر قلب امه يارب يارب
ويصبر اهله يارب

وحسبى الله ونعم الوكيل فى كل ظالم ومفترى

اللهم أأأأأأمين
اللهم أأأأأأمين
اللهم أأأأأأمين

واعرفوا حاجه بجد خالد ميغلاش على الا خلقه
هو احن عليه من امه وابوه

وليه حق هياخده فى الأخره فى يوم رد المظالم بأذن الله
حقه مرحش

Mahdy Moubarak يقول...

كان نفسى أناقشك .. بس،،،،

خلص الكلام، ومات الولد !

الله يرحمه ..

مهدى

(ست* جنى* الحسن) يقول...

سلامو عليكو..
الله يكون فى عون امه ويصبرها ويأجرها خير على مصيبتها.
الواحد بقى مش عارف يدعى دعاء الظلم على اليهود ولا على اللى عمل كده فى خالد خصوصا اسمه غالى عليا اوى.
اللهم اضرب الظلم بالظلم.

موناليزا يقول...

حسبى الله ونعم الوكيل

باحث عن حب يقول...

samy
نورت وشرفت اول
مره
فى المدونه
ياريت تتكرر الزياره
فعلا حسبنا الله ونعم الوكيل

السلام عليكم

 السلام عليكم  يا اهل التدوين معرفش هتفتكروني ولا... بس لاقيت ذكريات وكلام يوجع القلب سنين كتير مدخلتش هنا  وراجعت ذكريات ١٠ سنين ورا لاقيت ...