نزلت من المترو وركبت مواصله بسيطه
كده اجرتها حوالى 75قرش
ولميت الاجره واديتها للسواق وانا اصلا مش بحب الم الاجره خصوصا
لو فيه باقى ربع جنيه
واللى بيركبوا مواصلات زى حالاتى عارفين المعاناه
بتاعه الربع جنيه
المهم لافيت الاجره للسواق
وقالى ناقص واحد لاقيت
واحد بيقول فى واحده مش دفعت
قالت مش معايا فلوس
مش معايا فلوس
ووشها احمر
وبتبص فى الارض
قلت ادفع انا خفت حد يفهمنتى غلط قام راجل كبير دفع
ليها السواق قال لآ محدش يدفع لها
بصيت على البنيه
لاقيتها محترمه لبسها محترم زى
اى بنت فى مصر على وشها حزن والم كبير قوى
وماسكه شنطه كتف باين قوى انها فاضيه
نزلت وهى نزلت قلت اديها فلوس من اللى معايا
خفت تفهمنى غلط وحقها تفهم اى حد غلط
صعبت عليا قوى قوى
معرفش قصتها ايه ولا راحت فين ولا عمرى ما قبلتها تانى
ولو قابلتها مش هعرفها
فى ناس الحزن راكبها
والفقر واكلها ومحدش حاسس بيها دى مثلا ايه قصتها محدش الله اعلم بيها
فى حاجاتت كتيره بتمر علينا فى حياتنا
وكل واحد مشغول فى كوكبه
وانشغالاته
الاخوان السلفيين
عبدالله بدر بيشتم ولسانه طويل
خالد عبدالله لسانه اطول البرادعى الهولوكوست
بوذا الطياره الهيلوكوبتر
وناس مش لاقيته تاكل
وبرضوا بتاحفظ على كرامتها
وشرفها
محدش بيبص لتحت
يا من تتشدقون بالدستور
والشريعه
وتصرفون الملالين فى اتوبيسات تلموا فيها الناس بالاجر او غير الاجر وتأجرون
طائره للتصوير
البشر للكثره فى ناس
مش لاقيه تمن العلم اللى بتوززعه
وفى ن اس مش لاقيه الخيمه اللى حضرتك قاعد معتصم فيها
فى التحرير
وفى ناس مش لاقيه تمن البدله اللى حضرتك لابسها
فى الحوار ولا تمن الساعه اللى فى ايديك
مش علشان يلبسها
لا علشان ياكل بيها
فى 50 فى الميه تحت خط الفقر
وثوره الجياع قادمه
ثوره الجياع قادمه
اتقوا الله فى اللى الناس اللى تحت
حفاظ البنت دى اللى بحكى عليها على شرفها
هو حفاظ على الشريعه اللى
بتنادوا بيها
ومحاوله دفع الراجل للاجره ده تطبيق للشريعه
وعدم اخذ السائق
الاجره
\ده
تطبيق للشريعه
شريعتنا متربين عليها كعرف مجتمعى مش كهنوت لازم نعمله
ده بالفطره والاسلام فى مصر من زمان قوى مش لسه هيدخل
ونحن فى رباط الى يوم الدين
بصوا شويه للناس اللى تحت
وكفايه كفايه بقه
والله الناس مش لاقيه تاكل
.jpg)
هناك 4 تعليقات:
صباح الغاردينيا محمود
تصدق بالله وربي وجعتني
أنا عارفه أني دي حكاية بسيطة من حكايات كتير كلها ألم وخوف وفقر وحزن ولا حدش حاسس فيهم بس ماقدرتش إلا أشوفها قدامي ياترى كانت رايحه فين وعامله ايه وسكتها صح ولا غلط مش يمكن جبرتها الدنيا على الألم بجد مش عارفة أمتى المسؤلين يحسو بـ المسؤلية آمتى العالم تحس انها انسان من حقه حاجات كتير في بلده ...!!"
؛؛
؛
لروحك عبق الغاردينيا
كانت هنا
reemaas
والله يا محمود لو على نفس منطقك
يا حضرة المعترض على قرارات مرسي محدش لاقي حق البدلة اللي حضرتك لابسها وطالع بيها في التلفزيون
ويابية ياللي معتصم في الميدان محدش لاقي مأوى يسكن فيه زي الخيمة اللي انت ناصبها
ويا استاذ يالي طالع ع المنصة بتدعو الناس لاعتصام مدني محدش لاقي تمن الساعة اللي انت لابسها
الطرفين سيان يا محمود نفس اتهماتك ليهم هي نفس اتهماتي للطرف التاني ( دا اذا استعملت منطقك )
وبعدين عبد الله بدر
وخالد عبد الله
لا يعبرون الا عن انفسهم فقط
تحياتي
لولا
فى ناس الحزن راكبها
بصوا للناس اللى تحت
الناس مش لاقية تاكل
.....
كله بيتخانق مع كله
مفيش حد بيشوف غير نفسه
مفيش حد بيحس بالناس الغلابة اللى مش عندها حتى الاحتياجات الأولية للحياة
مش قادرين نرحم من فى الأرض حتى يرحمنا فى السماء
تدوينة حلوة
بس وجعتلى قلبى ربنا يسامحك
الله عليك يامحمود انت لخصت كل الكلام فى طرحك الراقى
فعلا بيحصل الموقف ده مع اختلاف القصة معايا كتير ويمكن معانا كلنا لكن حسبنا الله ونعم الوكيل فيمن يتعمدون تغيرر مسار البلد الى الاسوء
احيك ايها الرائع
إرسال تعليق